Runar Myrnes Balto ja Svein Atle Somby Anne Toril Eriksen Balto, Sametinget

– Mii oaidnit kontuvrraid vuorjašuhtti unnideamis, mii sáhttá leat áittan olles Sámi klinihka eksistensii. Danne mannat mii dál oktii ja buktit várohusa, dadjaba Myrnes Balto ja Somby fárrolaga.

Sámi klinihkka lea Kárášjogas ja lea erenoamážit heivehuvvon sámi pasieanttaide ja gullá Finnmárkku buohcciviesu vuollái.

Sámediggi dáhttu ráđđádallamiid

Sámediggeráđđi Myrnes Balto lea váldán oktavuođa Davvi dearvvašvuođain (Helse Nord) ja dieđihan ahte son Sámedikki bealis dáhttu ráđđádallamiid Finnmárkku buohcceviesu DF (Finnmarkssykehuset HF) organiserema rievdadeami birra.

– Mii leat cealkán Davvi Dearvvašvuhtii ahte mii gáibidit ráđđádallamiid dieđihuvvon ođđasitorganiseremiid birra mat gusket Sámi klinihkkii, daid oalle ođđa konsultašuvdnanjuolggadusaid mielde sámelágas, lohká sámediggeráđđi Runar Myrnes Balto.

Gieldda fuolastupmereive

Kárášjoga gielda, gielda gos Sámi klinihkka lea sajustuvvon, lea sádden fuolastupmereivve sihke Davvi dearvvašvuhtii ja dearvvašvuođaministarii.

– Mii leat dovddahan min earenoamáš vuorjašumi dasa ahte njunne-beallje-čotta doavttir dál sirdojuvvo eret Sámi klinihkas, ja geriatriijafálaldaga váilevaš huksemii klinihkas. Mii oaivvildit ahte dan sáhttá ipmirdit sámi álbmoga ovttaárvosaš fálaldagaid dihtomielalaš unnideapmin, dadjá sátnejođiheaddji Somby.

ILO-konvenšuvdna

Lea sihke Sámedikki ja Kárášjoga gieldda beroštupmi ahte spesialistadearvvašvuođabálvalusat sámi álbmogii fertejit oažžut nationála organiserema mas lea sierra bušeahtta ja stivra, jus Norga galgá čuovvut ILO 169.

– Dat proseassat maid mii dál oaidnit čájehit čielgasit ahte Finnmárkku buohcceviessu ii nákce áimmahuššat daid ovttaárvosaš fálaldagaid olles sámi álbmogii. Ferte danne loktet Sámi klinihka eret Finnmárkku buohcceviessu HF:s ovddemus dilis, nanneba sihke sámediggeráđđi Myrnes Balto ja sátnejođiheaddji Somby.