Sámediggi bidjá olles dievasčoahkkima njukčamánus meannudit Duohtavuođa- ja soabahankommišuvnna raportta sisdoalu, ja dát ášši šaddá stuorámus eaŋkilášši maid Sámediggi lea meannudan dán rádjai. Lea historjjálaš dievasčoahkkin mii dollojuvvo njukčamánus, ja dasa bohtet olu bovdejuvvon guossit ja galledeaddjit. Danne lea Sámedikkis maiddái viiddis kultuvrralaš prográmma.

Dáiddačájáhus Duohtavuohta ja soabaheapmi 

Duohtavuođa- ja soabahankommišuvnna raportta meannudeami oktavuođas čájeha Sámediggi raportta dáidaga.

Duohtavuođa- ja seanadankommišuvnna raportta oktavuođas almmuhuvvojedje oktan raporttain 13 dáidaga. 12 dain čájehuvvojit dál Sámedikkis Kárášjogas.

Čájáhus "Dáruiduhttin ja soabaheapmi" lea oaidnin ládje Sámedikkis dál, dievasčoahkkinvahku miehtá ja gitta beassážiid rádjai.  

Lávostallan - vuostáiváldin dollagáfiin lávus

Gaskavahku njukčamánu 6. beaivvi ja duorastaga njukčamánu 7. beaivvi, cegge Sámediggi ovttas mátkeealáhusaktevrrain Sámipath lávu olggobeallái Sámedikki, gos guossit, guossit ja politihkkárat besset fitnat reflekterema dahje ságastallama dihte, dahje dušše gáfestallama dihte.

Erenoamáš dánsunčájálmas

Gaskavahku njukčamánu 6. beaivvi, ovdal go Sámedikki dievasčoahkkin meannudišgoahtá Duohtavuođa- ja soabahankommišuvnna raportta, de čájehuvvo erenoamážit dán váste ráhkaduvvon dánsunčájálmas man namma lea "Shaddie" Sámedikki dievasčoahkkinlanjas. Dat čájehuvvo ovttas Sámi Dáiddaguovddážiin (SDG).

Performánssa birra:

Stuorát vuordámušaiguin boahtá stuorát ballu. Ballu kultuvrra massimis. Mo ovttastahttit balu ja šaddama. Mo šaddat massekeahttá vássán áiggi, ja máŋggadáfotvuođaid vássán áiggis, mas leat ollu traumat. Muhto maiddái vássánáiggi, mas lea kultuvrra čábbodat ja dan ráhkisteapmi, maid dálá servodat ohcá.  

Dáiddárat leat Liv Aira, Linn Lindström og Jenny Schinkler. Buvttadeaddji lea Liv Aira.

Ofelastimat

Lea áigumuš ofelastimiid lágidit Sámedikkis dievasčoahkkima oktavuođas, sihke eŋgelasgillii ja dárogillii.

• Gaskavahku njukčamánu 6. beaivvi dii. 13.00 lea ofelastin eŋgelasgillii Sámedikkis 
• Duorastaga njukčamánu 7. beaivvi dii. 13.00 lea ofelastin dárogillii Sámedikkis 
• Bearjadaga njukčamánu 8. beaivvi dii 10.00 lea ofelastin Sámedikkis eŋgelasgillii

Konsearta Emil Kárlseniin

Duorastaga njukčamánu 7. beaivvi dii. 18.30 lea konsearta artisttain Emil Kárlseniin Sámedikki girjerádjosis. Konsearta lea nuvttá ja rabas buohkaide. Konsearta sáddejuvvo maiddái njuolga Sámedikki neahtta-TV:s, vai nu olusat go vejolaš besset geahččat konseartta.

Emil Kárlsen, Omasvuonas eret, oaččui diibmá Sámedikki giellaloktenbálkkašumi su barggu ovddas oahppat, čalmmustahttit ja geavahit sámegiela almmolaččat. Doaimmastis dáiddárin ja artistan lea Emil Kárlsen ovdamearkan ollu dasa mas raporttas lea sáhka: mo sáhttá váldit ruovttoluotta giela, luođi ja kultuvrra maid ovddit buolvvat leat massán, ja válljet atnit dan vuođđun iežas bargoeallimis ja eallindilis.

Nissonbeaivvi čalmmustahttin

Njukčamánu 8. beaivvi dii. 09.00 šaddá nissonbeaivvi čalmmustahttin dievasčoahkkinlanjas. Girječálli Mary Ailonieida Sombán Mari lohká iežas diktačoakkáldagas «Beaivváš Mánát - Leve blant reptiler».