Maja Kristine Jåma
Åse M. P. Pulk/ Sametinget
– Mearrádus lea vuoitun ja lávki rievttes guvlui mearrasámi guovllu álbmogii, go mearrasámi árbevirolaš geavaheami árvu ja giliid boahtteáigi deattuhuvvo. Sámediggeráđđi háliida giitit Romssa suohkana buori prošeaktajođiheami ovddas mas mielváikkuheapmi ja rabasvuohta guoskevaš oasálaččaiguin plánaproseassas lea leamaš vejolaš, dadjá sámediggeráđđi Maja Kristine Jåma (NSR).
Sámedikki mielas lea dehálaš beassat bivdit árbevirolaččat ja ahte mearraguovlluin ii galgga nuoskkideapmi. Plánaguovllus leat juo ásahuvvon máŋga čáhcedikšunrusttega, ja ovdalaččas leat 43 dohkkehuvvon čáhcedikšunlokalitehta plánaguovllus. Ođđa riddoavádatplánas besset dušše njeallje ođđa lokalitehta ásaiduvvot.
– Sámediggeráđđi lea duđavaš go riddoavádatplána lea áigon viidát háhkat dieđuid ja doallat rabas gulahallama, gos aktevrrat leat beassan ságastallat ja dieđut leat čuvgehuvvon. Mii leat maid ilus go suohkanat Báhccavuotna, Romsa ja Karlsøy dáinna geažuhit ahte árbevirolaš guolásteapmi ja guovllut mat eai leat biliduvvon leat dehálaččat, dadjá Jåma.
Sámediggi lea ovddidan vuosteákkaid riddoavádatplánii dainna ákkain ahte das leat heajos váikkuhusat sámi kultuvrii ja ealáhusdoaibmamii. Areálat mat ledje evttohuvvon akvakultuvrii ledje guovlluin gos leat dihto riiddut, ja mat eai gierdda birasnuoskkideami nu bures. Mearraguovlluid ollislaš deaddu lei maid mearrideaddjin Sámedikki vuosteákkaide riddoavádatplánii. Sámedikkis lea leamaš viiddis gulahallan suohkaniiguin, iešguđetlágan fágaossodagain, guolástusorganisašuvnnain ja eará relevánta aktevrraiguin plánenproseassas.
– Sámediggi ovddida dušše vuosteákkaid jus lea mearkkašahtti mearkkašupmi sámi kultuvrii dahje ealáhusdoibmii. Mii árvvoštallat ahte akvakultuvrra boahttevaš ásaheapmi Ráinnas, Ruohtnuoris ja Várdnás čuohcá dehálaš árbevirolaš guolástanguovlluide. Báhccavuonas lea birrasa vuhtiiváldin dehálaš. Lean ilus go vuosteákkat leat vuhtii váldon, loahpaha Jåma.
Riddoavádatplána mearrádusat Romssa- guovllus, Báhccavuona, Karlsøy ja Romssa suohkanat:
Romssa- guovllu riddoavádatplána revišuvdna - Romssa- guovllu Regiovdnaráđđi (tromso-omradet.no)
Gažaldagaid dahje jearahallama addá sámediggeráđđi Maja Kristine Jåma tlf +47 47 24 23 66,
e-poasta: maja.kristine.jama@samediggi.no