– Sámediggi lea ilus go mii dál leat vuolláičállán ovttasbargošiehtadusa Helse Midt-Norge RHF:in, dadjá sámediggepresideanta Silje Karine Muotka (NSR).

Ovttasbargošiehtadus Helse Midt-Norge RHF:in galgá leat mielde nanneme barggu addit sámi álbmogii Gaska-Norggas ovttaárvosaš spesialistadearvvašvuođabálvalusaid fálaldaga. Ovttaárvosat spesialistadearvvašvuođabálvalusat eakstudit ahte bálvalusfálaldat lea heivehuvvon pasieantta gielalaš ja kultuvrralaš duogážii. 

– Ovttasbargošiehtadus lea mielde buorebut láhčime dili nu ahte áimmahuššat sámi álbmoga vuoigatvuođa ovttaárvosaš dearvvašvuođabálvalusaide ja sihkkarastit ahte bálvalus lea heivehuvvon sámi buhcciid gielalaš ja kultuvrralaš duogážii, dadjá sámediggepresideanta.

Dearvvašvuođabálvalusat sámi pasieanttaide eai sáhte leat sorjavaččat ovttaskasindiviidaid máhtus ja ipmárdusas ja danne lea dearvvašvuođaásahusaid erenoamáš ovddasvástádus bálvalusaide. Helse Midt-Norges RHF:s lea stuora ovddasvástádus ovddidit spesialistadearvvašvuođabálvalusaid sámi pasieanttaide olles Gaska-Norggas.

– Ovttasbargošiehtadusain leat mii eanet dán ožžon formaliserejuvvot, ja dat lea buorre buohkaide. Jáhkán ahte ovttasbargošiehtadus lea buorren reaidun go galgá áimmahuššat dán ovddasvástádusa, dadjá sámediggepresideanta. 

Šiehtadus galgá maid váikkuhit dasa ahte šiehtadusbealit ovdalgihtii muitalit nubbi nubbái proseassaid ja áššiid birra main lea mearkkašupmi maiguin leat bargame.

Odne lea maid čoahkkin Sámedikki ja Helse Midt-Norge RHF gaskkas, mas fáddá lea viidáset čuovvoleapmi ovttasbargošiehtadusas ja áigeguovdilis áššit.

Loga ovttasbargošiehtadusa Sámedikki ja Helse Midt-Norge RHF gaskkas (PDF, 289 kB) (vuolláičállojuvvon ja scannejuvvon veršuvdna)

Ovttasbargošiehtadus Sámedikki ja Helse Midt-Norge RHF gaskkas (PDF, 107 kB)