Sámi klinihkka – SÁNAG/SANKS lea Oslo-guovllus ja veahkeha sin geat servet miellačájehemiide ja earáid geain lea dárbu psyhkalaš dearvvašvuođaveahkkái. Dá lea pykologspesialista Elisabeth Gerhardsen ovttas Fovsen-akšunisttaiguin Oslos.
Elisabeth Gerhardsen, SANKS
Sámediggepresideanta Silje Karine Muotka lohká dehálažžan sihkarastit ahte gávdno psyhkalaš dearvvašvuođaveahkki sihke dál miellačájehemiid áigge ja maŋŋil.
– Mii leat ilus go SÁNAG lea olamuttos Oslos dál ja áigot leat doppe ovddasguvlui, dadjá sámediggepresideanta, gii odne lea čoahkkinastán SÁNAG:in.
SÁNAG manná guovlluide gos sii geat servet miellačájehemiide leat, muhto lea maid deaivamis Sámi viesus ja Trefoldighetskirken girkus. Lea vejolaš oažžut vuosttašceahkkefálaldaga SÁNAG:is, gitta golbma diimmu terapeuta luhtte, doavtterčujuhusa haga. Čállojuvvo journálanotáhta, seammaládje go eará divššu oktavuođas dahkko, muhto dát ii sáddejuvvo fástadoaktárii, eará go jus ieš dan dáhttu.
Váldde oktavuođa SÁNAG bargiiguin Oslo-guovllus, dahje riŋge sin telefonguovddážii nummarii 78967430 bivdin dihte vuosttašceahkkefálaldaga. Ságastallamat sáhttet leat neahta bokte dahje fysalaččat Oslos.
Akšuvnna oktavuođas lea SÁNAG maid ásahan vuosttašceahkkefálaldaga sámi álbmogii muđui maid. Mánát/nuorat sáhttet váldit singuin oktavuođa dán nummaris: 78967420. Rávisolbmot sáhttet riŋget 78967430 jus áigot diŋgot áiggi.
Dát leat erenoamáš fálaldagat dan oktavuođas go demonstrašuvnnat leat jođus Oslos Fovsen-ášši dihte. Fálaldat bistá vuos dán mánu, muhto sáhttá árvvoštallojuvvot guhkiduvvot.