Duogáš
Duohtavuođa- ja soabahankommišuvnna raporttas ja das go Sámediggi ja Stuoradiggi leat meannudan dan, lea čielgasit boahtán ovdan ahte lea stuora dárbu njulget vahágiid maid dáruiduhttin lea dagahan.
Dáruiduhttin lea hávváduhttán báikegottiid ja háviid ferte dikšut. Ollugat leat giela ja kultuvrra massán, ja sii sáhttet dárbbašit veahki ja doarjaga dan proseassas go áigot gávdnat, váldit ruovttoluotta dahje nannet iežaset sámi identitehta.
Vaikko vel leage ollu dahkkojuvvon sámi kultuvrra revitaliserema ja nannema ovddas, de lea ain báhcán ollu bargu. Ollugiin váilot sámi searvevuođaarenat.
Buot sápmelaččat galget oažžut:
- sámi mánáidgárdefálaldaga
- sámegiel oahpahusa vuođđo- ja joatkkaskuvllas
- vejolašvuođa jeavddalaččat searvat deaivvadanbáikkiide gos lea sámi giella- ja kulturfálaldat
Gulaskuddama birra
Sámediggi čađaha guvllolaš gulaskuddanproseassaid buot válgabiirriin oažžun dihte eanet máhtu báikkálaš dárbbuid birra.
Mihttu lea gávnnahit:
- makkár fáldaldagat, ortnegat ja doaibmabijut dárbbašuvvojit
- galgá go nannet dahje rievdadit áŋgiruššama
- movt buoremusat sáhttá sámi gielaid ja kultuvrra ealáskahttit, seailluhit dahje nannet.
2026 čavčča čađahuvvo gulaskuddan Viesttarmeara válgabiirres. Dat lea njealját válgabiire gos dollojuvvo dákkár gulaskuddan. Sámediggi áigu golmma jagi áigodagas doallat gulaskuddamiid buot válgabiirriin.
Masa Sámediggi háliida vástádusaid?
Sámediggi háliida oažžut cealkámušaid dás:
- sámi báikkálaš servodagaid ja ovttaskas olbmuid dárbbuid birra njulget dáruiduhttima vahágiid
- maid báikkálaš sámi aktevrrat ieža sáhttet bargat
- movt suohkanat, norgalaš ásahusat ja organisašuvnnat sáhttet veahkehit
- makkár doaibmabijuide Sámediggi galggašii láhčit dili
- leago dárbu rievdadit dahje nannet Sámedikki doarjjaortnegiid
Álbmotčoahkkimat
Seammás go čađahuvvo čálalaš gulaskuddan, de dollojuvvojit rabas álbmotčoahkkima válgabiirres:
- Ájluokta: Borgemánu 26. beaivvi, dii. 18.00-20.00, Árran julevsáme guovdásj, Njárgga 33, 8270 Drag
- Sálat: Borgemánu 27. beaivvi, dii. 18.00-20.00, Nordlándda álbmotmeahcceguovddáš/Nordland nasjonalparksenter, Saltfjellveien 2035, 8255 Røkland
- Suortá: Čakčamánu 9. beaivvi, dii. 18.00-20.00, Kulturfabrikken, Strandgata 1, 8400 Sortland
- Áhkánjárga: Čakčamánu 10. beaivvi, dii. 18.00-20.00, Áhkánjárga girjerádju/Narvik bibliotek, Kongens gate 39, 8514 Narvik
Gáfestallančoahkkimat
Álbmotčoahkkimiid lassin dollojuvvojit maid gáfestallančoahkkimat, gos lea maid vejolaš buktit cealkámušaid:
- Ruŋgu: Čakčamánu 10. beaivvi, dii. 12.30-14.00, Ruŋggu giliviessu/Spansdalen grendehus, Holmeveien 34, 9357 Tennevoll
- Skánik: Čakčamánu 11. beaivvi, dii. 12.00-14.00, Várdobáiki sámi guovddáš, Skånlandsveien 78, 9440 Evenskjer
Eanet dieđut almmuhuvvojit Sámedikki neahttasiiddu kaleandarii ja min sosiála mediain go leat mearriduvvon. Áiggit sáhttet rievdat – čuovo mielde min kanálain vai oainnát ođastuvvon dieđuid.
Álbmotčoahkkimat ja gáfestallančoahkkimat leat rahpasaat buohkaide. Álbmotčoahkkimat dulkojuvvojit sámegielas dárogillii applikašuvnna bokte. Váldde mielde iežat bealljetelefovnnaid jus siđat dulkoma. Gáfestallančoahkkimat eai dulkojuvvo.
Movt searvat gulaskuddamii?
Sáhtát sáddet čálalaš gulaskuddancealkámuša skovi bokte:
Jus it sáhte deavdit digitála skovi, de sáhtát maid sáddet iežas gulaskuddancealkámuša poasttas.
Sámediggi
Poastaboksa 3
9735 Kárášjohka
Gulaskuddancealkámušat leat almmolaččat almmolašvuođalága mielde ja almmuhuvvojit Sámedikki neahttasiidui.
Gulaskuddanáigemearri lea čakčamánu 18. beaivvi 2026.