Duohtavuođa- ja soabadankommišuvnna raportta ja raportta čuovvovaš meannudemiid bokte sihke Sámedikkis ja Stuoradikkis, lea čielgasit boahtán ovdan ahte lea stuora dárbu njulget dáruiduhttima vahágiid. Dáruiduhttin lea hávváduhttán báikkálaš servodagaid ja daid háviid šaddá dikšut. Vaikko leage ollu dahkkojuvvon ealáskahttin ja nannen dihtii sámi kultuvrra, de lea ain ollu bargu. Oallugat leat massán sámegielaset ja kultuvrraset, ja sis sáhttá leat dárbu oažžut bagadeami ja doarjaga dan proseassas go galget gávdnat, váldit ruovttoluotta dahje nannet iežaset sámi identitehta. Oallugiin ii leat gos besset servvoštallat eará sámiiguin.
Buot sápmelaččain galgá leat vejolašvuohta oažžut sámi mánáidgárdefálaldaga, sámegiel oahpahusa vuođđo- ja joatkkaskuvllas ja deaivvadansajiid gos leat sámi giella- ja kulturfálaldagat.
Sámediggi bovde guvllolaš gulaskuddanproseassaide main áigumuš lea gullat makkár dárbbut guhtege válgabiirres leat sámi fálaldagaid, ortnegiid ja doaimmaid dáfus. Gulaskuddamiid vuođul galgá árvvoštallojuvvot man muddui ja mainna lágiin dát iešguđetge sámi válgabiirret dárbbašit oažžut juogo nannejuvvot dahje rievdaduvvot viidáset áŋgiruššama sámegielaid ja sámi kultuvrra ealáskahttima, seailluheami dahje nannema dáfus.
2026 čavčča doallá Sámediggi gulaskuddama Lulli-Norgga válgabiirres. Dat lea viđat válgabiire gos dollojuvvo dákkár gulaskuddan. Golmma jagis galgá buot Sámedikki válgabiirriin leamaš gulaskuddan.
Loga gulaskuddanreivve (PDF, 330 kB)
Maid háliida Sámediggi diehtit?
Sámediggi háliida diehtit makkár dárbbut sámi báikkálaš servodagain ja ovttaskas olbmuin leat dáruiduhttinvahágiid njulgema dáfus. Midjiide lea maid dehálaš beassat diehtit maid báikkálaš sámi aktevrrat ieža sáhttet dahkat, mainna lágiin suohkanat, Norgga ásahusat ja organisašuvnnat sáhttet veahkehit, ja makkár doaimmaide Sámediggi galggašii heivehit. Dasa lassin háliidit mii gullat leago dárbu rievdadit dahje nannet Sámedikki doarjjaortnegiid.
Álbmotčoahkkimat
Seammás go lea čálalaš gulaskuddan, de dollojuvvojit maid golbma álbmotčoahkkima válgabiirres:
- Stavanger: Gaskavahkku golggotmánu 28. beaivvi dii. 18.00-20.00, Folkets Hus, Sal 1, Løkkeveien 22, 4008 Stavanger
- Bergen: Duorastaga golggotmánu 29. beaivvi dii. 18.00-20.00, Litteraturhuset i Bergen, Amalie Alver-rommet, Østre Skostredet 5-7, 5017 Bergen
- Oslo: Skábmamánu 5. beaivvi – dii. 18.00-20.00, Litteraturhuset i Oslo, Skram-rommet, Wergelandsveien 29 0167 Oslo
Dieđut báikki ja praktihkalaš áššiid birra leat gávdnamis Sámedikki neahttasiiddu kaleandaris ja min sosiála mediain go leat válbmasat. Áiggit sáhttet rievdat – čuovo mielde min kanálain leatgo dieđut ođastuvvon.
Álbmotčoahkkimat leat rahpasat buohkaide. Buot čoahkkimat dulkojuvvojit sámegielas dárogillii. Stavangeris dulkojuvvo sámegielas dárogillii Interactio-áppa bokte. Váldde mielde iežat bealljetelefovnnaid jus dárbbašat dulkoma.
Movt searvvat gulaskuddamii?
Buohkat geat háliidit, sáhttet sáddet čálalaš gulaskuddancealkámuša skovi bokte dás vuollelis.
Gulaskuddanáigemearri lea skábmamánu 23. beaivvi 2026.
Searvva gulaskuddamii – deavdde skovi dás
Jus it sáhte sáddet digitála skovi, de lea maid vejolaš sáddet cealkámuša poasttas.
Sámediggi – Sametinget
Poastaboksa 3
9735 Kárášjohka/Karasjok
Gulaskuddancealkámušat leat almmolašvuođalága mielde almmolaččat ja almmuhuvvojit Sámedikki neahttasiidduide.