Sámediggeráđđi ja Ráđđehus leat soahpan hábmet oktasaš plána sámi luossabivdokultuvrra seailluheapmái. Plána duogážin lea ahte luossabivdu lea maŋimus jagiid njiedjan garrasit sihke jogain ja mearas, ja das leat váikkuhusat árbevirolaš sámi luossabivdokultuvrra doaimmaheapmái ja sihke giela ja árbedieđu gaskkusteapmái boahtte bulvii. Sámediggi ja Dálkkádat- ja birasdepartemeanta háliidit dál cealkámušaid plánabargui. 

Gažaldagat maidda Sámediggi ja Dálkkádat- ja birasdepartemeanta háliidit vástádusaid

Plána vuolggasadjin lea ahte luossabivdu lea dehálaš oassi sámi kultuvrra luondduvuđđosis. Vuođđun lea dárbu hálddašit luossamáddodagaid guoddevaš vuogi mielde, muhto oassin plánabarggus galgá árvvoštallot sáhttá go lágidit hálddašeami nu ahte dat buorebut seailluha sámi luossabivdokultuvrra.

Sámediggi ja Dálkkádat- ja birasdepartemeanta háliidit vástádusaid dáidda gažaldagaide:

1. Mo berre seailluhit, nannet ja joatkit sámi luossabivdokultuvrra, dás maiddái:
   1. luossabivddu árbevirolaš doaimmaheami, dás maiddái teknihkalaš gálggaid, vugiid, árbevieruid, dábiid ja oahpahanvugiid?
   2. árbedieđu luosa, luossabivddu ja luosa eallinguovlluid birra?
   3. sámegieldoahpagiid luosa ja luossabivddu birra, oktan báikenamaiguin ja luonddu ja jagiáiggiid válddahemiiguin?
   4. vuoiŋŋalaš doaimmaid luossabivddu oktavuođas, ovdamearkka dihtii bálvvosbáikkiid árvvusatnima ja geavaheami?
   5. báikkálaš historjjá, máidnasiid, njálmmálaš máinnastanvieruid ja luđiid mat čatnasit luossabivdui?
   6. duoji, borramušvieruid ja eará kultuvrralaš geavadiid ja ealáhusaid mat vulget luossabivddus?
   7. eará árvvuid, geavadiid dahje árbevieruid mat gullet birgejupmái daid guovlluin gos lea ja leamaš sámi luossabivdu?
2.  Mo berre buhttet daid negatiiva váikkuhusaid maid luossabivddu njiedjan lea dagahan olbmuid ekonomalaš dillái, sosiála eallimii, fierpmádagaide ja ássanmoktii daid sámi guovlluin gos luossabivdu lea leamaš vuođđun ássamii?

Mo searvat gulaskuddamii?

Buohkat sáhttet addit cealkámušaid. Čálalaš gulaskuddancealkámušaid galgá sáddet Sámedikki neahttasiiddu skovi bokte. Gulaskuddanáigemearri: juovlamánu 31. b. 2025.

Searvva gulaskuddamii - deavdde skovi

Jus it sáhte geavahit digitála skovi, de sáhtát sáddet gulaskuddanvástádusat poasttas.

Sámediggi –Sametinget
Poastaboksa 3
9735 Kárášjohka/Karasjok

Gulaskuddancealkámušat leat almmolaččat almmolašlága vuođul ja almmuhuvvojit Sámedikki neahttabáikkis.