Čuovvoleapmin Duohtavuođa- ja seanadankommišuvnna raportii mearridii Sámediggi diibmá lágidit gulaskuddamii ja gulahallančoahkkimiid buot válgabiirriin. Sámediggi dáhttu báikegottiin ja oktaskasolbmuin gullat guđet sámi fálaldagat ja ortnegat dárbbašuvvojit din lagašbirrasis. Vuosttas čoahkkimat álget dál Davviguovllu válgabiirres, ja sámediggepresideanta Silje Karine Muotka oasálastá buot njeallje álbmotčoahkkimiin.
– Mii sávvat olbmot buktet oaiviladdimiid. Dáruiduhttimis leat leamašan stuorra váikkuhusat sámi servodagaide, ja dál lea áigi dievvan divvut ja nannet daid guovlluid gos garraseamosit leat čuohcan sámegillii ja kultuvrii. Mii dárbbašat din jienaid dán bargat buori vuogi mielde, dadjá sámediggeráđđi Runar Myrnes Balto.
Álbmotčoahkkimat dollojit buohtalasat čálalaš gulaskuddamiin.
– Mii leat válljen doallat álbmotčoahkkimiid bieđgguid biirres, ja báikkiin gos dál leat unnán fálaldagat. Muhto lea dehálaš deattuhit ahte dát lea gulaskuddan mii guoská olles válgabiirii, gosa Davvenjárga, Ráisa ja Láhppi gullat. Danne mii sávvat ahte olbmot olles válgabiirres oassálastet sihke álbmotčoahkkimiin ja čálalaš gulaskuddamis, muitala Myrnes Balto.
Masa dáhttu Sámediggi vástádusa?
Sámediggi dáhttu oaiviladdimiid dasa guđet dárbbut sámi báikegottiin ja ovttaskasolbmuin leat dáruiduhttima vahágiid divvumii. Lea maid dehálaš čuvget maid báikkálaš sámi oassádalli ieš sáhttá bargat, mo gielddat, dáža ásahusat ja organisašuvnnat sáhttet veahkehit, ja guđiid doaimmaide Sámediggi berre láhčit saji. Dasa lassin sávvat gullat lea go dárbu rievdadit dahje nannet Sámedikki ruhtadoarjjaortnegiid.
Loga eambbo gulaskuddanreivves: Gulaskuddan - Dárbu sámi fálaldagaide, ortnegiida ja doaibmabijuide Davveguovllu válgabiirres (PDF, 137 kB)
Álbmotčoahkkimat
Álbmotčoahkkimat leat rahpasat buohkaide ja dollojit dáppe:
- Hámmerfeasta: cuoŋománu 2. b. 2025 dii. 18.00–20.00, Gjenreisningsmuseet, Kirkegata 19.
- Návuotna: cuoŋománu 3. b. 2025 dii. 18.00–20.00, Árres, Leiraveien 24.
- Skiervá: cuoŋománu 8. b. 2025 dii. 18.00 - 20.00, Møteplassen PåHjørnet, Strandveien 51.
- Áltá: cuoŋománu 9. b. 2025 dii. 18.00 - 20.00, Alta Kultursal, Follums vei 33
Sámediggi ávžžuha buohkaid geain leat dovddiidusat, dárbbut dahje árvalusat oassálastit proseassas. Du jietna lea dehálaš!
Gulaskuddan Davveguovllu válgabiirres lea vuosttas daid ollugiin mat bohtet. Boahttevaš jagiin galget sullalaš gulaskuddamat dollot buot válgabiirriin.
Loga eambo dás: Duohtavuođa- ja soabahankommišuvnna raporta - Sámediggi
Gulaskuddancealkámušat
Gulaskuddancealkámušat áššis