Sámediggepresideanta Silje Karine Muotka (NSR) debáhtas, dá govviduvvon fárrolaga Oljo- ja energiijadepartemeantta stádačálliin Elisabeth Sæther (Bb).
Jon Petter Gintal/Sámediggi
Lean máŋgii ieš suokkardallan oassálastima dán oktavuođas, muhto juoga mii lea vissis: eanas politihkalaš mearrideaddjit ovddastuvvojit nannosit Arendalsuka oktavuođas.
Sámedikki maiddái bovdejit Arendalsuka iešguđet lágidemiide. Eai buot, eaige várra buot ságastallamiidda maidda leimmet háliidit searvat, muhto fáttáide maidda min leat bovden maiddái leat dehálaččat. Dán jagi searvvan ollu ságastallamiidda iešguđet fáttáid birra, ovdamearkka dihte hástalusat ja čovdosat Sápmái, movt gozihit álgoálbmogiid vuoigatvuođaid dálkkádatroasus, duohtavuođa ja soabadeami birra, Arktis geopolitihkalaš ”hotspotan” ja maid min servvodat galgá dahkat go vuostálasvuohta ja militariseren lassána davvin, gulahallan oktavuođaid huksema várás luondduhálddašeamis mas leat ollu soahpatmeahttunvuođat, olmmošvuoigatvuođat ja dáidda ja kultuvra, movt eallit dálkkádatrievdamiiguin, movt sihkkarastit ahte unnitlogut searvvahuvvojit bargui buoret seksuála dearvvašvuođa ovdii ja boahtteáiggi stuorámus álbmotdearvvašvuođahástalusaid birra.
Sámi jienaide lea váttis gullot ja oidnot Arendalsukas. Lágidemiid gaskkas lea gilvu ja geahččit leat máŋggaláganat. Vaikko gii sáhttá lágidit ja doallat eahpedássásaš panela mas industriija deattuhuvvo sakka, ja mas eai leat vuostejienat. Davvi-Norgga -beaivi lea ođđa industriija ja energiija birra, mii lágideddjiid mielas lea “áitojuvvon sihke váilevaš fámu ja bargofámu geažil, ja leat stuora riiddut eatnamiid alde”. Lágideaddjit leat earret eará Seastinbáŋku 1 Davvi-Norga ja ST1, fitnodat mii lea plánen Davvi bieggafápmorusttega Rásttigáisái. Sámediggi ii leat bovdejuvvon dása.
Ii leat buorre čoavddus ahte industriijaberoštumit ja dáža politihkkárat ságastit min boahtteáiggi birra min haga. Danne Sámediggi vuoruha searvat lágidemiide gos mis lea aktiiva rolla ja gos sáhttit ovddidit iežamet politihka. Okta min váldodieđuin Arendalsukas lea ahte buot boahtteáiggi hástalusat galget čovdojuvvot olmmošvuoigatvuođaid rámmaid siskkobealde, ja ahte friddja ja ovdagihtii dieđihuvvon miehtan ferte leat eaktun ovddasguvlui.