Ráhkis oapmahaččat, olbmát, bargoustibat ja morašteaddjit. Stuora morrašiin vuostáiválddiimet Bjørn Inge Mo jápmasága. Ii leat oktiige addon diehtit goas Beaivi viežžá  bártniidis  ja nieiddaidis iežas lusa fas. Mii leimmet sávvan guhkit beassat vásihit su liegga, oadjebas ja buori jođiheame.  Morrašis go leat massán árvvusadnojuvvon politihkalaš jođiheaddji ja servodathuksejeaddji, áiggi mielde galget liegga muittut su daguid birra čuodjat min gaskkas.  

Min jurdagat mannet su lagamuččaide, mii diehtit bearaš lea báhcán stuora morrašii.  Bjørn Inge vieččai sihke fámuid ja inspirašuvnna luonddus, ja jurddašit ahte maŋemus eahkeda son lei guollebivddus. Ieš lávii ge muitalit ahte dá lea juoga masa son bures liiko.

Bjørn Inge lei áŋgiris ja buorre politihkalaš jođiheaddji, lei čeahppi álggahit ja jođihit áššiid, ja lei čeahppi ovttasbargat earáiguin. Sutnje lei dehálaš ahte politihkalaš mearrádusat galge nannet sihke báikkálaš- ja regionála servvodaga, ja son beroštii das mo olbmot davvin dáhttot hábmet oadjebas ja buriid servvodagaid.

Ørjan Marakatt Bertelsen   
Sámi servodagas muitit erenoamážiid su áŋgiruššama, gos Bjørn Inge -okta máŋgga guovddáš olbmuin- lei mielde barggus mii buvttii historjjálaš duomu Čáhput áššis, mas sámi vuoigatvuođat dohkkehuvvojedje riektevuogádagas. Su bargu ovddidit mearrasápmelaččaid rivttiid, vuođđoealáhusaid ja sámegiela ja kultuvrra leat oasit su stuora servodatberoštumis maid son čájehii olu guovddáš jođihandoaimmaid bokte servodagas.

Bjørn Inge Mo:s lei guhkes politihkalaš karrieara ja son lei Tromssa bargiidbellodaga jođiheaddji 2005 gitta 2014 rádjái. Son lei maid sámediggeáirras 2017 rájes dassái go oaččui virgelobi ámmáhis jagis 2020. Mo lei maid sátnejođiheaddji Gáivuonas 2003 gitta 2015 rádjái.

Su bargu ii galgga vajálduvvut. Bjørn Inge Mo fáhkka vádjoleapmi lea stuorra vahágin politihkalaš Sápmái ja Norgii. Mii galgat váldit mielde muittuid su bargguin, su oadjebas ja nanu jođiheamis, su beroštumis ja áŋgiruššamis min buohkaid ovddas ja su jáhku lagamusaide.

Moai dáhtto sihke Sámedikki ja Sámi álbmoga bealis giitit Bjørn Inge go nu guhkes áiggi lea áŋgiruššan sámi servvodaga dihte. Mii eat vajálduhtte su áŋgiruššama, mii lei nu ollugiid ovddas.

Moai gulahetne ráfi su muitun.