Sámedikki bealis háliidan dáid muitosániid dadjat Ellen Inga O. Hætta hávdádeamis.

Mii galgat odne váldit earu Ellen Inga O. Hættain. Lea lossat ja váivi čuožžut dás, ja geahččalit gávdnat jeđđejeaddji sániid bearrašii, sohkii ja olles Guovdageainnu-servodahkii.

Ellen Inga lei utnolaš, son lei višuneara ja sus lei garra dáhttu gávdnat ovdánanpotensiála. Son lei maid dakkár gii ozai čovdosiid - dat mii orui veadjemeahttun galggai šaddat vejolaš, ii unnit iige eanet. Unnimus prošeavttaid rájes gitta stuora dehálaš signálavisttiide, nu go ovdamearkka dihte dat visti mii dál lea ceagganeame dáppe Guovdageainnus. 

Ellen Ingga árjjalaš áŋgiruššama ja áŋgirvuođa haga, de livččii vel guhká ádjánan ovdal go teáhter ja joatkkaskuvla visti livččii duohtandahkkojuvvon.

Ellen Inga lei maid historjjálaš. Son šattai árrat politihkalaš aktiivvalaš, juo 35-jahkásažžan šattai son Guovdageainnu vuosttaš ja dássážii áidna nisson sátnejođiheaddji. Son lei dat áidna nisson boazodoallohoavda ja lei vuosttaš sápmelaš gii válljejuvvui NRK stivrii. Son háhppehii maid bargat guokte jagi Sámedikkis ossodathoavdan.

Leat olu buorit muittut Ellen Ingga birra áiggis go son lei Sámi oahpahusráđi direktevra. Son beroštii das ahte galggai leat sámi fágasidoallu skuvllas, ja son oaččui sihke bargiid ja fágagirječállit buvttadit sámi oahppogirjjiid buoremus dásis. Sutnje lei diehttelas ášši ahte sámi ohppiin galget leat seamma buorit oahpponeavvut go dat mat majoritehtaohppiin ledje.

Stáhtačállin lei son duostil. Son lei ovdavázzi ja huksii nanu politihkalaš fierpmádaga, sihke norgga ja sámi servodagas. Go son manai sárdnestullui, de son lei juo jurddašan buriid sániid dadjat mat galge oažžut guldaleddjiid ipmirdit makkár gáibádusaid son bijai ovddasvástideaddji eiseválddiide, oažžun dihte ovdáneami sámi servodagas.

Son beroštii sámi árbevieruin, árbevirolaš máhtus, ja árvvus anii sámi vuođđoealáhusaide. Sámi boazodoallohoavdan oinnii son boazodolliid dárbbuid, ja son lei lojála iežas álbmogii.

Áiggun maid buktit dearvvuođaid sámediggepresideanttas Silje Karine Muotkas ja maiddái ovdalaš sámediggepresideanttas Aili Keskitalos. Goappešagat leaba bivdán mu giitit Ellen Ingga su áŋgiruššama ovddas sámi servodaga ovddas.

Dat ahte leat servodatberošteaddji, loktet sámi leavgga, ja áŋgiruššat sámi servodaga buorrin, ii leat álo seamma álki. Muitu Ellen Ingga doaimma ja áŋgiruššama birra boahtá álo midjiide muitalit historjjá duohta sámi ambassadevrra birra.

Mii Sámis boahtit ohcalit su, ja mii boahtit dovdat ahte son ii leat šat min searvvis iežas buolli áŋgiruššamiin.

Vuoiŋŋat ráfis!