Hui ollu giitu bovdejumis, ja lea buorre dinguin odne dás Mázes gávnnadit.
Dát sámi giláš lea okta dain deháleamos váibmosuonain mii govve Sámi servodagaid. Dávjá láven jurddašit sin birra geat leat bidjat ollu návccaid dán gillái doalahit ássama. Áiggiid čađa lea din áŋgiruššan leamašan stuoris ja dii lehpet bidjan ollu searaid máŋggaid logi jagiid - buolvvas bulvii.
Máze eallin ja orrun dat lea gievrudan ollugiid, ollugat leat rámis go dáppe besset orrut. Dán lean mun vásihan. Dis lea nana dáhttu! Dii lehpet nu rámis gullevašvuođain ja čájehehpet dan. Dis, giliássiin, lea nana sámi čehppodat, sihke kultuvrras ja árbevirolaš máhtus. Sámegiella lea nanus ja lea váldogiellan dáppe
Min mánát leat dehálepmosat midjiide, sii leat min boahtteáigi. Mii fertet mánáide ordnet buori dili ja vuođu bajásšaddamis. Sámegiella, sámekultuvra ja oadjebas árgabeaivi. Mii dárbbašat boahtteáiggis sámegielagiid. Mii dárbbašat giliid gos sámegiella lea eanetlogu giellan. Dákkár gilit eai leat šat nu máŋga! Eai ge leat šat nu máŋga suohkana gos sámegiella lea váldogiellan, muhto Máze gilis, dáppe lea sámegiella vuoitigiellan.
Olles Davvi-Norggas vásihat eretfárremiid. Dasa leat moanat ákkat. Guhtta duhát olbmo leat čieža jagis fárren eret golmma davimus fylkkain. Dát vuorjá mu! Mii diehtit ahte eanaš háviid de leat nuorat geat fárrejit, vulget oahpuid gaccat. Lea ollu mii geavvá nuorraolbmuid eallimis. Mii gal rievtti mielde háliidat ahte eatnašat sis fas galggašit máhccat ruovttoluotta ja dán fertet máŋggalágan vugiiguin geahččalit duohtandahkat.
Okta dain deháleamos osiin ássamis, lea buorre oktavuohta. Ahte buohkat besset vásihit buori dahje positiivvalaš eallima, nu mo dii- geat válljebehtet orrut justte dán báikkis. Nubbi eará bealli lea ahte mo daid vuođđobálvalusaid olaha ja doalaha. Dát guoská sihke almmolaš ja priváhta fálaldagaide.
Háliidan dás deattuhit, ahte Máze gilisearvi áŋgirvuohta oassálastit gili doaimmain- ráhkadit daid buriid fálaldagaid ja doaimmat mat leat geasuheaddjin. Fálaldagat mat bisuhit olbmuid dáppe, ahte eai datte fárre eret. Lea buorre oaidnit ahte eaktodáhtolaš bargu lea nanus Mázes ja vel go dát jahki han lea eaktodáhtolaš jahkin.
Iežan bealis, de lean hui giitevaš buot dan áiggi maid máŋga Mázelačča leat munnje addán. Sii leat bagadallan, viššalit juogadan máhtolašvuođa ja maid jearran mus dehálaš gažaldagaid. Munnje lea dát mearkkašan erenomáš ollu – go mun han lean bajásšaddan eará guovllus.
Máze gilli boahtá ceavzit! Máŋggas leat ražastan bisuhit gili ja dát áŋgiruššan lea mearkkašan hui ollu ollugiidda. Loahpas velá háliidan didjiide dadjat, ahte dáhtus lea máilmmifápmu.
Sávan buohkaide buori vuordináiggi juovllaide!