Aina Madelén Nordsletta Aslaksen, Håvard Larsen Janne Hansen/Sámediggi

Håvard Larsen riegádii 1955:s Burovuonas, Návuonas. Dál son orru Eljásnjárggas, Báhccavuona suohkanis. Håvard Larsen devddii 70 jagi ođđajagimánus, ja sus lea leamaš girjás karrieara, go lea badjel njealjelogi jagi bargan duojárin. Son lea okta Sámi dovdoseamos duojáriin, ja bargá ain dál duojárin. 

Håvard Larsen lea dovddus iežas máŋggalágan dujiid dihte, nugo iežas náhpiid, guvssiid ja goavdásiid dihte. Sus lea erenoamáš čehppodat ja ávnnasáddejupmi, ja geavaha árbevirolaš ávdnasiid, nugo muora, čorvviid, sistti ja metálla. Larsen lea eanemus dovddus iežas niibbiiguin. Son ráhkada ieš iežas niibederiid, ja nu seailluha sámi niibeárbevieruid. Larsen lea ožžon máŋga bálkkašumi. 

Larsena barggus vuohttá čađamanni árbevirolaš árvvuid mat bisuhit duoji iešvuođaid ja funkšunalitehta, ja mas ávkkástallan ja atnu leat guovddážis. Son lea duođaš váikkuhan mearrasámi garraduoji oainnusmahttimii ja fievrrideapmái. Su bargu seailluha mearrasámi garraduoji ealli kulturárbin. Duodjelanjastis Báhccavuonas bargá son geažos áigge duodjeárbevieruid ovddidemiin, ja duddjo guvssi guvssi maŋis ja niibbi niibbi maŋis, ja lea ge dan dihte dehálaš árbevierroguoddi Sámis – erenoamážit mearrasámi kulturárbbi guoddi. Juoga man dihte mii buohkat leat giitevaččat. 

Larsena duojit leat sihke dáidagat ja atnubiergasat. Su duojit leat Sámedikkis, ja eanetlogujoavkku čoahkkinlanjas mis lea náhppi man Håvard Larsen lea dahkan. Mii lávet iežamet čoahkkimiin geavahit náhpi snoahpamušaide, ja nu leage hui ávkkálaš duodji, mii bisseha min politihkkáriid varrasohkkara njiedjama. 

Mus eai leat peršovnnalaš čanastagat deike, eaige Håvard Larsenii. Muhto go iežan áhkkui muitalin ahte ledjen deike boahtemin rahpat čájáhusa, de son viežžalii čáppa niibbi man lea juo várra 20 jagi áigi oastán, man ii leat rásken geavahit eará go čikŋan. Son jearai ahte leago son dá Larsena duodji, go lei merkejuvvon HL:ain. 

Larsena duojit leat árvvus adnojuvvon ruovttuin miehtá Sámi. Lean nu ilus go Davvi Álbmogiid Guovddáš guovddáš háliida “Håvard Larsen – Eallin duojárin” čájáhusain čalmmustahttit Larsena eallinagi barggu sámi duoji loktemiin ja seailluhemiin. Lea buorre go lea olles čoakkáldat vurkejuvvon boahtteáigái ja boahttevaš buolvvaide, ja doaivvun ahte čájáhus šaddá inspirašuvdnan min boahttevaš mearrasámi duojáriidde.

Sámedikki bealis sávan mun lihku jubilántii, Håvard Larsenii, ja Davvi álbmogiid guovddážii dáinna buriin bargguin!