Ráhkis dáiddárat ja dáiddaberošteaddjit,

Lea earenoamaš beroštahtti munnje odne beassat rahpat čájáhusa “Skakke folkedrakter” dahje “Eahpedábalaš álbmotbiktasat” ja muđui searvat otná doaluide.

Čájáhus gieđáhallá fáttáid dego gullevašvuohta ja rámisvuohta, muhto maiddái olggušteapmi, heahpatvuohta ja suhttu. Dáiddárat leat geavahan fotografiija, čuoldima, pearralbargguid, porselena, installašuvnnaid, čuojanasaid ja dánssa go leat buokčalan duodje- ja bivttasárbevieruide.

Márjá Karlsena dáidda “Láigečála” gaskkusta beaktilis jurdagiid mat čalmmustahttet nuorra sámiid hástalusaid. Karlsen govve dan beaivválaš dáistaleami ja nu čilge iežas sániiguin – láigečállagiin – dáruidahttima čiekŋalis morraša – dáruiduhttima árbi mii dađi bahábut báidná min sámi servvodagaid otná dan beaivvi.

Diet perspektiivvat leat maid áigeguovdilat Duohtavuođa ja soabahankommišuvnna raportta olis, gos earret eará dáruiduhttinpolitihka guhkit áigge dagut ja váikkuhusat čilgejuvvojit dárkilit. Lea midjiide dehálaš dál dán raportta loktet ja ávkkástallat dán áigeguovdilis vejolašvuođa, vai sávvamis olahišgoahtit ja oažžugoahtit duohta dásseárvvu maiddái Sápmái buot servvodatdásiin.

Mis lea ain guhkes geaidnu ovddosguvlui, ja dalle lea ge vuogas jus mis leat suonjardeaddji ovdavázzit. Dáidaga giella sáhttá ge guoskkahit váimmuid ja nu joavdat mealgat dobbelii, gosa politihkkára sánit eai álo olat.

Sáván lihku buot dáiddáriidda čájáhusain: Márjá Karlsen, Harald Beharie, Rafiki, Lin Wang, Håvard Kranstad ja Christian Blandhoel.

Giitu mu oasis.