Buorit olbmot,

Giitu bovdehusas!

Dáidagis lea fápmu. Ja dáidda sáhttá rájiid njeaidit. Iešguđet dáiddahámiid gaskkas, dáidaga ja dáiddaduoji gaskkas ja buolvvaid ja riikkarájiid gaskkas, sáhttet leat rájit. Daid rájiid sáhttá jávkadit. Dáidda dávjá sáhttá áššiid gaskkustit beaktileappot go dan maid mii sániiguin nagodit. 

Mun bures liikon fitnat dáiddačájáhusain, ja áinnas háliidan hástaluvvot, hirpmahuvvat ja illosit. Dáidda sáhttá hástalit ja gaskkustit vássánáiggi, dálááiggi ja boahtteáiggi máŋgga ládje. Dáidda ja dáiddárat ovdanbuktet guhkes historjjá, ja oainnusmahttet áigeguovdilis áššiid. 

Mun lean rámis ja ilus go erenoamážit sámi dáidda ja sámi dáiddárat leat nu oidnosis dál. Sámi dáidda ja sámi dáiddárat ožžot ollu fuomášumi riikka ja riikkaidgaskasaš dásis. Dáidda ja dáiddárat dolvvodit min vaikko gos máilmmis, ja dat lea erenoamáš somá, ja mii oažžut buohkat illudit dan dihte.

Dát čájáhus čájeha sámi dáidaga dahje sámi dáiddáriid dáidaga girjáivuođa. Lean oaidnán ahte čájáhusas oidno nuorra ja čeahpes dáiddára Ramona Salo Myrsetha dáidda, Árpogovva. Dáppe maiddái oidno dovddus dáiddára Synnøve Persena dáidda, Davviáhpi. Ramona Salo Myrseth váldá ovdan eatnamiid ja luondduriggodagaid massima, ja Synnøve Persena dáidaga ges sáhttá dulkot eatnamiid ja duovdagiid gudnejahttimin. Mii leat ilus go min dáiddárat ožžot fuomášumi iežaset buori barggu ovddas. Dáidda ja dáiddárat leat mielde ovddideame ja hástaleame servodaga.

Čájáhusas leat dáidagat maid Sámedikki dáidaga ja duoji sisaoastinlávdegoddi lea oastán áigodagas 2020:s 2025 rádjái. Grethe Gunneng lea jođihan lávdegotti. Mun lean ilus dán dehálaš barggu dihte. Sisaoastinlávdegoddi bargá bures ja oamedovddolaččat. Lea hávski beassat návddašit dán fiinna čájáhusa dáppe Sámi Dáiddaguovddážis. 

Sámediggi bargá duohtan dahkat sierra sámi dáiddamusea. Mii dárbbašit sierra ruovttu sámi dáidagii ja duodjái, gos sihkkarastit buriid rámmaid daid vurkkodeapmái ja gaskkusteapmái. Mihttu lea oažžut áigái ođđa visttiid RiddoDuottarMuseaide dáppe Kárášjogas, gosa čáhket sihke buorit magasiinnat ja buorit čájáhuslanjat dáidaga ja kulturhistorjjálaš dávviriid čájeheapmái. 

Muhto odne mii leat dáppe, ja dáidda mii midjiide čájehuvvo beroštahttá, hástala ja illudahttá!

Giitu mu oasi ovddas!