Buorit olbmot, sávan erenoamaš buori eahkeda didjiide, sihke filbmadahkkiide, bovdejuvvon gussiide ja gehččiide geat leat boahtán geahččat erenomáš filmma dáppe Mázes.

Álttá-ášši ja Guovdageainnu eanu dulvadeapmi, dát lea dehálaš oassin Máze servodaga ođđa historjjás. Dáhpáhusat mat váikkuhedje sakka Mázii ja min lagaš guovlluide, sihke 1970-logus ja 80-logus. Ja čuoččuhan vel dan maid, ahte dáin dáhpáhusain leat leamašan váikuhusat Máze-gillái gitta otnážii.

Eatnasat mis leat juoga nu láhkai čadnon dáidda historjjálaš dáhpáhusaide. Min lagasfuolkkit, ustibat ja ránnját ledje mielde vuosttaldeamen dulvadeami ja maiddái vuosttaldeamen garrasit vai Máze gilli ii šaddan čáze vuollái.

Dál odne lea vuot historjjálaš boddu dáppe min gilis. Filbmadahkki Ole Giæver lea mearridan ahte mii galgat leat dat vuosttažat geat oaidnit dán ođđa guhkesfilmma, mii muitala movt min gili olbmot, mii sápmelaččat vuosttaldeimmet sisabahkkemiid ja movt politihkalaččat morránedje sámit.

Mu mielas lea hui buorre go filbmaregissevra Ole Giæver lea dákkár vuđolaš mearrádusa dahkan. Ehtalaččat leat riekta ahte sin gean birra muitalus lea, sii maid besset oaidnit dán vuosttažiin.

Filbmadahkki máhcaha iežas stuorra filbmaprošeavtta daidda olbmuide, geaidda dát guoská. Sii geat ražastedje sámi álbmoga ovddas. Máŋggas sis vásihedje ahte gudnejahttin ja giitin ii oba dihtton ge. Danne lea maiddái munnje jeđđehussan, go filbmadahkki Giæver háliida dáinna lágiin hukset luohtehahttivuođa iežas dehálaš filmmain.

Sávvat maid hui bures boahtima váldoneavttárii Ella Marie Hætta Isaksenii, gii dál lea dáppe min searvvis, geahččamin minguin fárrolagaid vuosttaš geardde filmma “Ellos eatnu - La elva leve”. 

Mii illudit oaidnit movt don lihkostuvat neavttárin, go mii han diehtit ahte don leat čeahpes lávlu ja áŋgiris sámi vuoigatvuođaid bealušteaddji.  Deike leat maid boahtán sii geat leat bargan filmma duogábealde ja mii sávvat sidjiide maid bures boahtima. 

Filbma lea fámolaš ja filbma lea váikkuheaddjin. Ođđa buolvvat bohtet oahppat eambbo Álttá ja Guovdageainnu eanu dulvadeami birra ja dát filbma boahtá sihke oahpahit ja buktit dehálaš digaštallamiid, sihke Sámis ja muđui máilmmis. Maŋŋil premiere, de eallá filbma iežas eallima, festiválas festiválii ja nu fas máilmmigeahččit oahpásmuvvet min dáistalemiiguin.

Sámedikki bealis, de sávan lihkku didjiide buohkaide ja lean gealdagasas oaidnit movt dát oahpes historjá čájehuvvo ja muitaluvvo filmmas “Ellos eatnu, La elva leve”!

Giitu bovdejumis ja illudan sakka dán boddui!