Jon-Christer Mudenia, Håvard Larsen Inger Tjikkom, Sámediggi

Gonagas Haakon VII ásahii Gonagasa Ánsomedálja guovvamánu 1. beaivvi 1908:s. Dat addojuvvo bálkkašupmin earenoamáš ávkkálaš barggu ovddas servvodahkii buorrin, nugo dáidaga, kultuvrra, diehtaga, ealáhusdoaimmaid ja sosiála ja humanitára bargguid surggiin. 

Odne lea stuora beaivi. Håvard Larsen oažžu Gonagasa Ánsomedálja. Mun lean rámis go beasan leat dáppe Sámedikki bealis go okta min sámi ovdavázziin, Håvard Larsen, gudnejahttojuvvo iežas barggu ovddas.

Håvard Larsen lea riegádan 1955:s Burovuonas, Návuonas, ja dál son orru Eljásnjárggas, Báhccavuona suohkanis. Sus lea girjás karrieara, go lea badjel njealjelogi jagi bargan duojárin. Son lea okta Sámi dovdoseamos duojáriin, ja bargá ain dál duojárin.

Håvard Larsena duojit leat árvvus adnojuvvon miehtá Sámi, ja son lea ožžon máŋga bálkkašumi barggus ovddas. Sámedikkis ovtta čoahkkinlanjas lea mis Håvard Larsena dahkan náhppi, ja dainna mii leat hui rámis.

Håvard Larsen Inger Tjikkom, Sámediggi

Håvard Larsen lea dovddus iežas máŋggalágan dujiid dihte, nugo iežas náhpiid, guvssiid ja goavdásiid dihte. Su duojit leat sihke dáidagat ja atnubiergasat. Sus lea earenoamáš čehppodat ja ávnnasáddejupmi, ja geavaha árbevirolaš ávdnasiid, nugo muora, čorvviid, sistti ja metálla. Larsen maiddái lea dovddus sámi niibeárbevieruid viidásat fievrrideamis.

Larsena barggus vuohttá čađamanni árbevirolaš árvvuid mat bisuhit duoji iešvuođaid ja funkšunalitehta, ja mas ávkkástalan ja atnu leat guovddážis. Son lea duođas váikkuhan mearrasámi garraduoji oainnusmahttimii ja ovddideapmái. Su bargu seailluha mearrasámi garraduoji ealli kulturárbin. Duodjelanjastis Báhccavuonas bargá son geažos áigge duodjeárbevieruid ovddidemiin, ja duddjo guvssi guvssi maŋis ja niibbi niibbi maŋis, ja lea ge dan dihte dehálaš árbevierroguoddi Sámis – earenoamážit mearrasámi kulturárbbi guoddi. Ja dan ovddas mii buohkat leat giitevaččat.

Lean maid ilus go Davvi álbmogiid guovddáš čalmmustahttá Håvard Larsena eallinagi duddjonbarggu sierra čoakkáldaga ásahemiin, mii čájehuvvo čájáhusas «Håvard Larsen – eallin duojárin». Lea buorre go lea olles čoakkáldat vurkejuvvon boahtteáigái ja boahttevaš buolvvaide, ja doaivvun ahte čájáhus šaddá inspirašuvdnan min boahttevaš duojáriidda. 

Sámedikki bealis sávan lihku Håvard Larsenii ja sávan dutnje vel lihku viidásat barggus!