Ráhkis olbmot, kjære godt folk!

Guovssahas mánáidgárdi ásahuvvui 1983:as, ja ávvuda 40 jagi dán jagi. Lei Romssa sámi searvi mii álggahii sámi mánáidgárddi dalle, ja maŋŋel lea Romssa suohkan váldán ovddasvástádusa jođihit sámi mánáidgárddi.

Guovssahas mánáidgárdi lea dán 40 jagi leamašan hui árvvusadnon ja dárbbašlaš deaivvadanbáiki sámi bearrašiidda ja mánáide. Mánáidgárdi lea leamašan hui dehálaš giellaarena sihke mánáide ja bearrašiidda, muhto maiddai sámi birrasii Romssa suohkanis.

Dán mánáidgárddis leat mánát beassan leat birrasis gos sii leat beassan hupmat iežaset gollegiela ja ahtanuššat sámi árvvuid ja kultuvrra vuođul. Dát ii livčče vejolaš jus mánáidgárddis eai livčče leamašan nanu ja čeahpes sámegielat pedagogat ja veahkkebargit. Sii dat leat geat leat láhčán mánáide dan buoremus mánáidgárdeárgabeaivvi. Mánát leat beassan mielde buotlágan sámi doaimmaiguin ja ožžon vásáhusaid maid leat váldán mielde viidáset eallimis. Mun gulan dávjá ahte olu mánáin leat buorit muittut báhcán mánáidgárdeáigodagas, maid mojonjálmmiid muittašit.

Dan maŋemus 20 jagi leat dán mánáidgárddis leamašan Sámedikki loguid mielde gaskamearálaččat sullii 30 máná juohke mánáidgárdejagi. Dát mánát leat ožžon buori ja nanu sámegielat mánáidgárdefálaldaga dáppe Romssa suohkanis. Mánáidgárdi lea leamašan vuođđun dasa ahte Báhpajávrri skuvlii bođii sámi fálaldat, ja mánát leat beassan sirdit skuvlii gos leat ožžon sámegieloahpahusa.

Sámediggeráđđi diehtá ahte lea stuora ášši jođus mánáidgárddi organiserema ja boahtte áiggi birra. Sámediggi čuovvu ášši ja sávvá ahte Guovssahas mánáidgárdi bisuhuvvo nanu sámi mánáidgárdin. Mii diehtit maid ahte Romssas maid leat leamašan hástalusat gávdnat sámegielat pedagogaid ja bargiid sámi mánáidgárdái. Soaitá leat okta čoavddus ahte čohkket fágabirrasiid.

Sámediggi lea čakčageasi álggaheamen nuvttá sámegielat mánáidgárdeortnega, ja mii sávvat ahte Guovssahas mánáidgárdi searvá nuvttá ortnegii.

Sávan hui olu lihku 40 jagi ávvudemiin.

Giitu.