Ráhkis buohkat,

Viimmat Finnmárkku vuosttaš Mánáidviessofálaldat sáhttá rahppot! Veahkaválddi ja vearredaguid eastadeamis lea áibbas dárbbašlaš ahte veahkkeapparáhtta sáhttá fállat bálvalusaid mat geográfalaččat leat lahkosis ja mas lea sámi kultuvra- ja giellagelbbolašvuohta. Go mánát ja nuorat leat hearkkimus diliin, de lea dehálaš ahte sii besset hállat muhtimiin gii máhttá sámegiela ja gii ádde movt lea leat sámi mánná.

Mánáidviesu ásaheapmi Finnmárkkus lea guhká leamaš vuoruhuvvon bargu Sámedikkis. Mii leat máŋgga oktavuođas ja máŋgga proseassas guovddáš eiseválddiiguin lokten dárbbu ollislaš Mánáidviessofálaldahkii sámi mánáid várás Finnmárkkus, ja leat dasto ilus go dat dál dáhpáhuvvá.  

Stuoradikki barggus deattuhuvvui ahte sámi guovlluin galgá ásahuvvot mánáidviessofálaldat. Mii illudat dasto dáinna čovdosiin gos ásahuvvojit fálaldagat sihke Áltái ja Kárášjohkii, ja mii sávvat ahte boahtá leat vejolaš doalahit fálaldaga Girkonjárggas. Dát lea buorre boađus konsultašuvnnain mat leat čađahuvvon Finnmárkku politijaguovllu ja Sámedikki gaskkas. Dál illudat dassážii go Kárášjoga kantuvra rahppo – sávvamis jođáneamos lági mielde!

Mun sávan dasto Sámedikki bealis lihku Finnmárkku politijaguvlui ja mánáidviesu bargiide. Giittán áŋgiruššama ovddas didjiide geat guhká lehpet bargan dán fálaldaga ovddas. Viimmat sáhttá fállojuvvot ollislaš Mánáidviessofálaldat Finnmárkkus.