Sámediggepresideanta sárdni ruoŧabeal Sámedikki rahpamis

Sámediggepresideanta sárdni ruoŧabeal Sámedikki rahpamis

Sámediggepresideanta Aili Keskitalo (NSR) searvvai ruoŧabeal Sámedikki allaáiggálaš almmolaš rahpamii, gaskavahku čakčamánu 1.b. 2021. Dás sáhtat lohkat presideanta dearvuođaid Sámedikki gávccát áigodahkii:

Gonagaslaš allavuohta, Sámedikkiid jođiheaddjit, sámediggeáirasat ja bures didjiide buohkaide.

Ođđa válgaáigodaga rahpan lea stuorra dáhpáhussan sihke midjiide geat leat álbmotválljejuvvon áirasat, muhto maiddai stuorra dáhpáhus sámi álbmogii. Sii leat válljen min leat álbmoga jietnaguoddin ja sin ovddas han mii dahkat mearrádusaid.

Dá lea ge dat beaivi, gos mii vuollegašvuođain váldit badjelasamet dán luohttámuša – ja dá lea maid dat beaivi goas áŋgirvuođain háliidat álggahit bargguineamet - mat leat vuordimin.  

Dii geat lehpet vuosttaš geardde searvan válggaide, din mielas leat dát dat stuorámus beaivi politihkalaš eallimis. Mii geat leat guhká leamašan oassin dás, diehtit bures ahte nu ii leat. Vuosttas geardde go searvá  válggaide daid ollu  lohpádusaiguin, dat orru din mielas álki. Stuorit dahje váddásat hástalussan lea dallego fas máhcat iežamet jienasteddjiid lusa, bivdit ođđa luohttámuša ja čilget sidjiide manne eat leat nagodan ollašuhttit buot lohpiduvvon lohpádusaid. Juohke háve go lean šaddan máhccat jienasteddjiidan lusa, de lea šaddan eanet ja eanet gudnebalolašvuohta leat álbmotválljejuvvon ovddasteaddji.

Dál go fargga lean luohpame doaimmas presideantan, de háliidan giitit go lehpet mu bures vuostáiváldán dáppe ruoŧa bealde.  Giitu 16-jagi ovttasbarggus ja ustitvuođas. Mus leat olu buorit muittut sápmelaččaid ovttasbarggus ja maiddái min oktasaš ovttasbarggus eará álgoálbmogiiguin. Sámi searvevuohta riikkarájiid rastá lea divrras árbi maid fertet vurket ja ovddidit. Maŋemus jagi leat mii buohkat dovdan ahte riikkarájit eai leat dušše sárgát kárttas, muhto sáhttet leat maid muvrrat mat bissehit  min buori ovttasbarggu ja earuhit min oahppásiin ja ráhkkásiin. Mun sávan dii sámediggeáirasat bargabehtet dan ovdii ahte njeaidit rádjacakkiid ja ahte stádat guddet ovddasvástádus, danne go min meannudit nu iešguđet ládje. Mun sávan dii joatkibehtet dan barggu maid buolvvat ovdal min leat bargagoahtán, ahte boahttevaš jagiid beassat mii sápmelaččat eanet ovttastallat ja nannet min searvevuođa. Mihttun lea sihkkarastit sámi boahtteáiggi, min mánát ja mánáidmánát galget leat sápmelažžan, galget oahppat sámegiela, ja gákti galgá leat lunddoleamos bivttas go čájehat iežamet vuoimmi.

Sámedikki bealis - din sámi oappáin ja vieljain norgga bealde - de sávan didjiide lihkku dáinna válgaáigodagain.

Giitu!