Buorre Beaivváš Sámi Našunálateáhtera jođiheaddjit, bargit ja stivra, ovddeš ja otná, buorit teáhtera ovttasbargoguoimmit ja ustibat, sávan buohkaide ollu lihkku ávvudemiin.

Sámedikki bealis, sámi álbmoga bealis ja maiddái iežan bealis háliidan giitit din buriid sámi teáhter-vásahusaid ovddas. Mun lean reaškán ja mun lean čirron, mu lehpet hirpmástahttán, hástalan ja bidjan jurddašit. Giittán go lehpet sihke buktán máilmmikultuvrra Sápmái sámegillii ja sámi hámis, muhto erenoamážit go lehpet min iežamet muitalusaid heivehan ja neaktán lávddis. Mus leat nu ollu divrras muittut ja vásáhusat čadnon Beaivváš Sámi Teáhterii. Ja heive bures dáppe kulturviesus ávvudit, gos gehččen Min duoddarat-čájálmasa hui nuorran. Diet teáhterbihttá ja musihkka mii ráhkaduvvui dasa čuovui mu olles nuorravuođa, ja lei oassin mu politihkalaš morráneamis.

Koronaáigi lea čájehan midjiide man deaŧalaš dat lea deaivvadit ja ovttas vásihit musihka ja kulturdáhpáhusaid. Diimmá fiidnámus muitu lei “Boahtte geassi”-čájálmas. Dalle duođaid dovden man ollu mun ledjen váillahan din. Ja, dal han lea dat boahtte geassi, duođai sávan ahte šaddá buoret go diimmá geassi.

Vaikko mii dáppe kulturviesus dál ávvudit, de lea maid buorre diehtit ahte ođđa teáhtervisti šaddá duohtavuohtan fargga, ja sávan dat lokte Beaivváža sihke praktihkalaččat ja dáiddalaččat. Fysalaš infrastruktuvra lea deaŧalaš, ja min našunálateáhter ánssáša ruovttu. Seammás jáhkkit mii Sámedikkis ahte lea deaŧálaš sámi álbmogii, geat ain orrut nu bieđggut, ahte Beaivváš bissu johtti teáhterin. Min skeaŋka Beaivvážii lea muittuhus dasa. Dat lea giisá, masa sáhttá vurket čiŋaid ja divraseamos diŋggaid mátkkoštettiin, čáppa sámi duodji mii heive sihke čikŋan ja praktihkalaš adnui. Bivddán stivrajođiheaddji boahtit vuostáiváldit skeaŋkka.