Ráhkis sámediggeáirasat, bálkkašumi vuoiti ja earát!
Lea stuora illu beassat geiget Sámedikki giellamovttiidahttinbálkkašumi 2021.
Sámediggi juohká giellamovttiidahttinbálkkašumi juohke njealját jagi olbmui, institušuvdnii, prošektii dahje jovkui mii lea suddjen, nannen ja ovddidan sámegiela. Sihke ovttaskas olbmot ja organisašuvnnat, institušuvnnat leat sádden evttohusaid midjiide gii ánssáše vuoitit bálkkašumi. Go áigemearri sáddet evttohusaid dievai cuoŋománu 30. beaivvi, leimmet ožžon 8 evttohusa. Dáid evttohusaid gaskkas lea sámediggeráđđi válljen vuoiti gii lea bargan dehálaš barggu sámi giela ja kultuvrra ovddideamis. Háliidan seammás giitit buohkaid geat leat sádden evttohusaid bálkkašumi vuoitin.
Bálkkašupmi lea 50 000 kr ruhtavuoitu ja dáiddadiploma. Dáiddár Kamilla Triumf lea ráhkadan diploma dán jagi vuoitái.
Dán jagi bálkkašumi vuoiti birra:
Vuoiti lea máŋga jagi áŋgiruššan ovddidit, nannet ja seailluhit sámegiela iešguđetge bargguid bokte. Vuoiti lea erenomáš deattu bidjan árbevirolaš máhttui ja fágagillii mii lea čadnon dasa.
Sámegiella lea árgabeaigiella oallugiidda, muhto fágagiella mii adno árbevirolaš bargguid barggadettiin ii leat šat nu nanus go ovdal lea leamaš go servvodat lea ollu rievdan ja ain rievdá. Vuoiti lea oaidnán dárbbu seailluhit ja nannet árbevirolaš máhtu ja giela mii lea čadnon dasa. Áŋgirvuođain ja ceaggáivuođain, vuollegašvuođain ja ráhkisvuođain sámegillii ja sámi kultuvrii, vuoiti lea buvttadan máŋga oahppogirjji mat dál leat ávkkálaččat su iežas bearrašii, sohkagoddái, sámi servvodahkii ja stuorraservvodahkii. Vuoiti lea earret eará čállán girjji lávostallama birra ja dan oktavuođas maid ráhkadan gilkoriid lávu namahusain maid atná oahpahusas go lávostallan lea fáddán. Gámagoarrun lea maid vuoiti buvttadan girji mii lea láidehus olbmuide gápmagiid goarodettiin. Vuoiti láve dasa lassin maid earret eará oahpahit árbevirolaš máhtu Sámi allaskuvllas gos fágagiella lea guovddážis.
Son lea maiddai ráhkadan erenomáš kaleandara, mii álgá miessemánus ja nohka cuoŋománu ja nu son čuovvu boazojagi. Kaleandar lea beaggán Sámis ja heaŋgá oallugiid ruovttuin.
Lea stuora gudni munnje juohkit Sámedikki giellamovttiidahttinbálkkašumi 2021:
Jusse Juhán Niillasa Gáre Márjái, Karen Marie Eira Buljoi Guovdageainnus eret.
Háliidan Sámedikki bealis sávvat ollu lihkku bálkkašumiin, ja giitit du Gáre Márjá dan barggu ovddas maid leat dahkan seailluhan ja nannen dihte váibmogiellamet ja -kultuvramet. Don ánssášat dán bálkkašumi go áŋgirvuođain ja vuollegašvuođain, iežat bargguid bokte, čilget sámi árvvuid, árbevieruid ja mot dat leat čadnon gillii. Mun sávan ahte bálkkašupmi movttiidahttá du joatkit giellaovddidanbargguiguin ain viidásit.