Ráhkis guldaleaddjit

Odne leat dása čoagganan muittašit dan ilgadis dáhpáhusa mii dáhpáhuvai 1945:s miessemánu 6.beaivvi, go 6 sivila guollebivdi Nuoris Finnmárkkus illástuvvoje ja gottahalle duiskalaččaide guokte beaivvi ovdal go nubbi máilmmi soahti nogai. Dát 6 olbmo ledje jerrron veahkkin fáktan Norgga suodjalussii.

Vaikkovel galge veahkehit Norgga suodjalusa, de eai lean sis vearjjut maiguin livčče sáhttán vuosttálastit go duiska soalddáhat bohte. Nuoramus dán guhttasis lei 16 jahkásaš ja boarraseamos 47 jagi boaris. Olbmot eallima álggus ja alimus agis.

Muittašit ovddeš dáhpáhusaid lea dehálaš ja dárbbašlaš eallimis. Vássán dáhpáhusaid mat váikkuhit olbmuide, ruovttuide ja báikegottiide. Muhtin dáhpáhusat čuhcet guhkit áigge ja hápmejit min – hábmejit makkárat mii šaddat ja movt mii eallit eallimeamet.

Ollugat sis geat vásihedje nuppi máilmmisoađi leat jávkkodan, muhto leat ain eallime olbmot geat muitet movt soađi áigge lei. Mii galgat atnit ávvira sin vásáhusain ja maiddái addit ánssu sidjiide geat heakkaset masse suodjaleames Norgga. Mii orrut odne ráfálaš riikkas. Mu mielas lea dehálaš eahccit ráfijurdaga go boahtteáigámet hukset, vai mii ja min maŋisboahttit ain beassat eallit friddja riikkas.

Sámedikki ovddas cealkkán dearvvuođaid didjiide geat massiidet lagamuččaideattet dán surgadis giđđabeavvi 1945:s. Ja mun geardduhan: Muittašit lea dehálaš - ja addit ánssu ja giitosiid sidjiide  geat masse heakkaset ráfi ovddas!