Buorit olbmot, 

«Gal dat oahppá» dahje «gal dat oahppá go stuorrula» lea hui čáppa sámi dadjanvuohki mu mielas. Go dát sátnevájas bidjá stuorra luohttámuša dasa ahte juohkehaš sáhttá oahppat vaikko maid, jus dušše oahppan- ja oahppaneavttut leat sajis. 

Dán birra čálliba Asta Balto ja Gudrun Kuhmunen girjjis «Máhttáhit iežamet ja earáid!» Dát lea buorre ráva midjiide buohkaide go galgat nannet iežamet sámegiela, oahppat sámegiela – dahje leat doarjjan sidjiide geat leat vázzimin bálgá šaddat sámegielagin. 

Mii leat hui gierdevačča mánáiguin, muhto mii galgat leat seamma gierdevačča rávisolbmuiguin. Ja nie lea go mii oahppat man nu ođđa, mii leat buohkat mánát álggus. Muittán hui bures man čuorbi mun dovden iežan go ledjen oahppamin ruoššagiela, ja man dehálaš lei munnje ahte olbmot mu birrasis ledje gierdevačča go mus ádjánii vaikko man guhkes áigi dadjat hui eaŋkilis áššiid. 

«Olmmoš oahppá guovtti soabbái» lea nubbi sátnevájas. Dat mearkkaša ahte mii oahppat olles eallinagi. Ja nu lea maid gielain. Don sáhtát álo oahppat ođđa sániid, dahje sátnevádjasiid, leš go dat nu ahte dat lea du vuosttaš sátni dahje ahte jo máhtát hállát, muhto háliidat oahppat ođđa sániid. 

Lea stuorra illu beassat rahpat Giellavahkku dáppe Kárášjogas. Lea somá go lehpet ráhkadan nu viiddis prográmma. Lea sihke filbmačájáhus, sámegielat yoga ja juoiganeahket. Giellavahkku lea dehálaš deaivvadanbáiki mii čalmmustahttá sámegiela ja gos mii sáhttit oahppat eanet sámegiela. 

Telefovnnas lea mus listu gosa láven čállit ođđa sániid go gulan daid. Okta sátni maid mun lean deike čállán lea gundu. Dat sáhttá govvidit olbmo gii lea roahkkat, áŋgir ja hutkái. Dien sáni in lean mun gullan ovdal, muhto hás mun áiggun dan geavahišgoahtit. 

Go lihkus leat mis ollu gunddut sámis! Odne gal ferten namuhit buohkaid geat barget sámegiela ovddideapmái – giellabargiid, oahpaheddjiid, jorgaleddjiid, tulkkaid ja čálliid. Kárenaš giella- ja kulturguovddáža, okta 19 giellaguovddážis, mii bargá hui dehálaš barggu dáppe giela ovdii. Muhto maiddái buot eará gundduid geat loktejit sámegiela – mii dárbbašat din vai min gollegiella eallá. Go buot deháleamos lea dat maid mii dahkat iežamet árgabeaivvis. 

Sávan didjiide buohkaide hui buori Giellavahkku!