Ráhkis olbmot,

Guokteduhát guoktelogi guokte lea leamaš gelddolaš jahki! Illudahttá leahkit sámediggepresideanta dakkár jagi go ná ollu fiinna ávvodoalut. Odne ávvudit olles 50 jagi dáppe Sámiid Vuorká-Dávviris. Makkár historjá. Dát lea hui dehálaš ásahus Sámis.

Lei midjiide stuora beaivi ođđajagemánu loahpageahčen dán jagi go gulaimet ahte dánska kulturministtar lei suovvan Poala-Ándde rumbbu bistevaččat bissut ruovttus Sámis.

Mii dovdat Poala-Ándde historjjá - Anders Poulsen ja su rumbu. Poala-Ánde biddjui giddagassii Unjárggas guhttanuppelotčuođi ovccilogi ovttas danne go rumbu lei su hálddus. Son gažaduvvui Čáhcesullos guhttanuppelotčuođi ovccilogi guovttis, muhto ii goassege dubmehallan, danne go vurde signálaid Københámmanis. Su huško jámas háldogiddagasas Čáhcesullos. Ii lean lobálaš eaiggádit ja atnit rumbbu.

Rumbbu válde ja dat sáddejuvvui Københámmanii, ja dan rájes lea leamaš gonagaslaš dáiddalatnjačoakkálmasas. Dassážii go luoikkahuvvui Sámiid Vuorká-Dávviriidda njealjelot- jagi áigi. Ja guhkes šiehtadallamiid maŋis sáhttit dál vuoiŋŋastit go rumbu beassá bissut ruovttus.

Mun beroštan kulturárbbis, ja mun beroštan vuoigatvuođain. Mii fertet rahčat min kulturárbbi vuoigatvuođaid ovddas. Olu min divrras dávviriin leat hágganan olggobeale Sámi. Earát hálddašit daid, ja mis lea unnán dadjamuš das movt historjá min birra muitaluvvo. Dál lea min duohken ákkastallat ja šiehtadallat min dávviriid birra. Mii háliidit eaiggáduššat ja hálddašit min historjámet. Lea njuolgut iešmearridanrievtti birra sáhka mii mis lea eamiálbmogin. Ja lea sáhka vuoigatvuođa birra beassat min iežamet historjjá muitalit.

Sámiid Vuorká-Dávvirat lea boarráseamos sámi musea Norggas, ja museačoakkálmasa barggus leat ruohttasat ovccinuppelotčuođi golbmalogi ovcci rájes. Otná museavisti ásahuvvui dáppe Kárášjogas ovccinuppelotčuođi čiežalogi guovttis. Guokteduhát guđas šattai Sámiid Vuorká-Dávvirat oassi vuođđudusas RiddoDuottarMuseas.

Lassin badjel vihttaduhát kulturhistorjjálaš dávviriidda gávdno dáppe min stuora fiinna čoakkálmas mas beannot duhát sámi dáiddalaš buktaga. Lea áigi beassat čájehit dan buori ja gutnálaš vuogi mielde.

Danne illudahttá fuomášit ahte viimmat lea várrejuvvon ruhta ođđa vistti viidáset plánemii mas galgá sihke kulturhistorjjálaš čoakkálmas ja dat fiinna dáiddačoakkálmas mii dáppe Sámiid Vuorká-Dávviriin lea.

Mii illudit ođđa vistái. Mii illudit dasa go dii galgabehtet riggodahttit min dáidaga, kultuvrra ja kulturhistorjjá boahttevaš buolvvaide.

Lihkku ávvudemiin!