Buorit olbmot,
Lea hui somá go bessen boahtit deikka ávvudit min álbmotbeaivvi ovttas dinguin.
Odne mii ávvudit searvevuođa mii ovttastahttá min sámi álbmogin. Dát beaivi lea midjiide muittuhussan mii máŋggabealatvuođa ja oktavuođa givrodat lea.
Romsa gal álbma sámi metropola. Dáppe gávdnojit measta buotlágan fálaldagat, ja gávdnojit buotlágan sápmelaččat! Sámi searvevuohta lea rikkis ja máŋggabealat. Mii leat oahpaheaddjit, dearvvašvuođabargit, gávpebargit, studeanttat, mánáidgárdebargit ja áŋggirdeaddjit, geat juohke beaivvi fárrolaga hábmet boahttevaš buolvvaid boahtteáiggi. Lea movttidahtti ahte Romssa gávpoga sámi historjá oidno eanet ah’ eanet, ja ahte Romssa suohkan háliida searvat sámi hálddášanguvlui.
Iluin oainnán ahte eanet ja eanet olbmot válljejit searvat sámi searvevuhtii. Dat addá midjiide doaivaga boahtteáigái mas sámegialas ja -kultuvrras lea nana sajádat. Dát ii leat vejolaš min čeahpes giella- ja kulturguddiid haga, dii geat juogadehpet iežadet čehppodaga buorrin buohkaide. Danin leat Sámedikkeráđđi mearridan nannet sámi giellaguovddážiid iežamet bušeahtas, vai sii sáhttet virgádit lasi bargiid. Gáisi giellaguovddáš oažžu 500 000 ru lassáneami dán jagi, ja boahtte jagi rájes 800 000 ru lassáneami.
Máŋgasiidda lea sámi árgabeaivi rahčamuš – rahčat eatnamiid ja čáziid vuoigatvuođaid ovddas, rahčat cielaheami ja vealaheami vuostá, ja rahčat gielaimet ja kultuvramet seailluhemiin, vai dat eai jávkka boarrásit buolvva mielde.
Stuoradikki historjjálaš ándagassii átnun midjiide stáda dáruiduhttinpolitihka ovddas lea dehálaš dohkkeheapmi vássánáiggi vearrivuođas. Dál mii sávvat ahte dat čuovvoluvvo konkrehta doaimmaiguin, mat čájehit ahte seanadanpolitihkka lea seamma nanus go dáruiduhttinpolitihkka oktii lei. Dát bargu gáibida ahte mii bargat searválaga, eat dušše sámi álbmogin, muhto maiddái oktan servodahkan.
Mus lean giitevaš go lean bajásšaddan áiggis mas sámekultuvra lea liđđon ja gos sámi dáiddárat leat oidnostan eanet ja eanet arenain. Oktii áiggis lei vejolaš vásihit buot sámi doaluid, nu guhkká go mátkeruhta doarvái ja luopmobeaivvit reahkkájedje. Dat áigi lea nohkan, ja mis lea eanet válljenmonni go goassi ge ovdal. Dat oidno erenomáš bures sámi vahkkus Romssas.
Romssa Sámi Viesu rahpan diibmá lei stuorra oláhus man ovddas máŋgasat leat rahčan measta 40 jagi. Viimmat lea mis deaivvadanbáiki man nu máŋgasat leat áibbašan. Dán vahkku gullui ahte Romssa Sámi Viessu lea fárremin, ja dat gal šaddá speanta. Sámediggeráđđi lea mearridan reviderejuvvon bušeahtas addit 300 000 ru lassáneami Romssa Sámi Vissui, ja mun sávan ahte dát ruhta boahtá ávkin din bargui.
Sámiálbmotbeaivi lea illubeaivi ja ávvubeaivi. Ávvudeatnot man guhkkás mii leat ollen, seammás go deavdit bahtteriid vai sáhttit joatkit bargat iežamet kultuvrra, gielaid ja álbmoga ovddas. Mus lea jáhkku vel čuovgadeappot boahtteáigái.
Lihkku beivái!