Buorit olbmot.
Munnje lea stuora illu beassat geiget dán jagi giellaloktenbálkkašumi!
Dán jagi lea njealját jahki go Sámediggi juohká giellaloktenbálkkašumi. Bálkkašupmi geigejuvvo juohke jagi Giellavahku oktavuođas. Sámedikki giellaloktenbálkkašumi vuoiti oažžu ruhtaskeaŋkka, 30 000 ruvnno ja dáiddadiploma. Diploma lea dáiddár Marte Lill Somby ráhkadan.
Dát doaibma biddjojuvvui johtui 2019:s dannego Sámediggi háliida fuomášuhttit ja gudnejahttit olbmuid ja áŋgiruššamiid mat leat čalmmustahttán, lokten ja nannen min váibmogielaid man nu ládje.
Dán jagi vuoiti lea nuorra sámi dáiddár ja artista ja 2019:s son válljejuvvui dan jagáš Riddu Riđđu nuorra sámi dáiddárin. Son lea maiddái neaktán Beaivváš Sámi Našunálateáhtera bihtás ja lea dál neaktime ođđa Disney+ -ráiddus ja sii leat juste dál filbmeme dasa.
Vuoiti lea aktiiva olmmoš gii iešguđet ládje lea bargan ja ain bargá sámegiela ovddidemiin ja čalmmustahttimiin. Son lea maŋemus jagiid oidnon ja gullon ollu mediain, sihke buvttademiid ja giellamátkkis dihte. Vuoiti lea ollu ovttas joavkkuin buvttadan ja ráhkadan musihka, muhto maŋemus jagiid lea maiddái okto buvttadan musihka.
Dán jagi bálkkašumi vuoiti lea Omasvuona suohkanis eret ja son ja su bearaš leat nugo ollu eará mearrasápmelaččat, válljen oainnusmahttit ja loktet iežaset sámi árbbi ja giela.
Sámediggeráđđi iluin addá jagi 2023 Giellaloktenbálkkašumi
Emil Ráste Nikolavu Karlsenii.
Sámegielas ii leat dušše sáhka gulahallamis, muhto das lea lagas čanasteapmi sámi identitehtii, kulturárbái ja gullevašvuhtii. Sámegiella govvida min oktavuođa, min árbbi ja čanasteami min máttuide ja gielain mii dovdat gullevašvuođa.
Dán Emil lea ovdanbuktán iežas musihka bokte. Emil lea váldán ruovttoluotta giela maid sin bearaš lea massán stáda garra dáruiduhttinpolitihka dihte ja lea rávisolmmožin oahppan sámegiela. Dainna lea Emil ovdagovvan dasa mot sáhttá váldit ruovttoluotta giela ja luođi maid ovddit buolvvat leat massán, ja válljet dan atnit vuođđun iežas bargoeallimis ja birgenlágis.
Mun háliidan Sámedikki bealis sávvat ollu lihkku bálkkašumiin, Emil Ráste Nikolavu.
Don ánssášat dán bálkkašumi go áŋgirvuođain leat bargan váldit ruovttoluotta gielat ja beaivválaččat barggat čalmmustahttit ja ovddidit min giela. Mun sávan ahte bálkkašupmi movttiidahttá du joatkit giellaovddidanbargguiguin ain viidásit sihke persovnnalaš dásis ja servvodatdásis.
Giitu.