Ráhkis buohkat,
Odne lea erenoamáš beaivi go mii leat čoahkkanan gudnejahttit Ingunn Utsi árvofámolaš John Savio-bálkkašumi vuoitin. Gudnejahttimiin eat dušše ávvut Utsi erenoamáš dáiddárkarrieara, muhto mii maiddái čalmmustahttit Utsi nanu barggu sámi kultuvrra, vuoigatvuođaid ja min sámi ruohttasiid gaskkusteamis.
Juo, ruohttasiid fal: Ingunn Utsi lea dovddus bargat ruohttasiiguin, rihkiiguin, geđggiiguin, dávttiiguin, náhkiiguin, dolggiiguin ja eará luondduávdnasiiguin maid son dávjá ovttastahttá eará ávdnasiiguin ja hábme skulptuvrralaš dáiddan dárkilis, vuollegaš ja guoddevaš vugiin, seammás go lea taktiila gulahallan ávdnasiiguin.
Davvisámegielas mis lea buorre sátni mii čilge guoddevašvuođa proseassa: Birgejupmi. Birgejumis ii leat sáhka dušše guoddevašvuođas ávnnaslaččat, muhto maiddái birgemis, ceavzimis ja máhttimis. Dat čilge sámi eallinvuogi ja kultuvrra dehálaš árvvu ja eallinfilosofiija. Birgejumi sáhttá ipmirdit birgennákcan, mearrin ja vuohkin movt olbmot birgejit dihto guovllus daiguin resurssaiguin mat gávdnojit fysalaš ja sosiála birrasis.
Utsi dáidda govvida sihke dan áiggehis ja rievdameahttumis oasi luonddus ja iešalddis eallimis, muhto maiddái čalbmeravkalanbotta ja gaskkaheami, ja dainna lágiin oažžu min smiehttat oktavuohtamet birra áigái ja maiddái min sajádaga luonddus.
Nu go Ingunn Utsi ieš dadjá: Buot osiin luonddus lea siellu.
Ráhkis Ingunn Utsi,
Dus lea erenoamáš vuohki ovdanbuktit luonddu sielu dáidagiiddát bokte. Don leat gába, nu go lea namma ovtta Davvi-Norgga Dáiddamusea čájáhusain dál, ja mii čilge čeahpes nissonolbmo mas lea ollu máhttu.
Du áŋgiruššan sámi dáidaga ovddas lea leamaš mearkkašahtti máŋgga dáfus. Don leat bidjan áiggi, návccaid ja máhtuidat ovddidit sámi dáidaga, kultuvrra ja kulturárbbi dakkár vugiin mii lea riggudahttán sihke Sámi, Norgga ja viidát riikkarájiid olggobealde.
Savio-bálkkašumi ánssášuvvon vuoitin leat don ovdagovvan midjiide buohkaide. Don čájehat midjiide makkár fápmu áŋgiruššamis, doaimmalašvuođas ja áŋgirvuođas lea dasa masa jáhkát. Don it leat vuoitán dušše bálkkašumi, muhto leat maiddái vuoitán min váimmuid ja árvvusatnima iežat hirbmat buori áŋgiruššama dihte sámi kulturárbbi ja identitehta nannemis.
Atnot dán bálkkašumi muittuhussan dasa ahte mii servodahkan dárbbašit dakkár olbmuid go don, geat bidjet fámuid seailluhit ja ovddidit kulturárbámet. Atnot dan maiddái bovdehussan smiehttat min oktavuođa birra lundui ja luonddu mearkkašumi midjiide ja luottaide maid mii guođđit boahtte buolvvaide.
Giitu, Ingunn Utsi, du movttiidahtti barggu ovddas ja lihkku bálkkašumiin. Mii leat hui rábmát dus ja sávvat ahte don ain ollu jagiid čuvget min eallimiid iežat dáidagiiguin, beroštumiin ja áŋgiruššamiin.
Giitu!