Ráhkkis Dáiddadállu,

Ollu ollu lihkku dáinna stuorra bálkkašumiin.

Oktii lei Dáiddadállu jurdda ovtta báberservieahtas, ja dál mii leat dáppe ávvudeamen din ja MUNCH-bálkkašumi.

Garra barggu bokte, nana verddevuođa bokte ja čielga geahčastagain boahtteáigái lehpet ceggen man nu mii lea stuorát go ovttaskas dáiddár, stuorát go dii ieža. Din loavdaga vuolde leat ollu dáiddárat gávdnan ruovttu ja siidaguimmiid. Dii lehpet čájehan ahte go mii čohkket návccaid de sáhttit olahit vaikko man. Ja dii, ja din dáiddárguoimmit, lehpet ollen miehtá máilbmái, sihke máilmmi stuorámus lávddiide, muhto maiddái eará álgoálbmogiid lusa.

Dáiddadálu dáiddárguimmiid gaskka gávdnojit sámi buot beakkáneamos dáiddárat, geat ieža leat ožžon stuorra bálkkašumiid ja leat beaggán miehtá máilmmi. Doppe leat Ibsen-bálkkašumi vuoiti, Spellemann-vuoiti, Venezia biennale-dáiddár, Dansekritikerprisen vuoiti. Leat nu ollu rámádusat ahte in geargga namuhit buot odne.

Muhto dán háve de oažžu olles siida bálkkašumi ovttain Norgga stuorámus dáiddaásahusain. Lean áibbas sihkkar ahte dát rámádus boahtá movttiidahttit din dehálaš barggu.

Sámedikki bealis háliidan dádjat ahte mii leat hui rámi dinguin. Ja háliidat giitit Dáiddadálu nana buori barggu ovddas ja sávvat lihkku bálkkašumiin.

Háliidan loahpahit Inga Rávnná Eira sániiguin ja lohkat oasi divttas “Áicen” gos son govahallá man dehálaš searvevuohta dáiddamáilmmis lea:

Ohcagohten earáid

Ráhkadišgoađán

duddjogoađán

muitališgoađán

juoigagoađán

Gávnnan earáid

Mun han ráhkadan

ja duddjon

Mun han muitalan

ja juoiggan

Mun han máhtán

ja nagodan

Mun han máhtán

na mun han máhtán

máhtán

Ollu ollu lihkku!