Tema for innspillsmøtene var om bevaring av den samiske laksefiskekulturen. Åpningsinnlegget er kun på nordsamisk: 

Buorre beaivi!

Giitu buohkaide geat leat boahtán otná cealkámuščoahkkimii dáppe Olmmáivákkis/Sálatis. Mun lean Muden-Ovllá Pier-Erkke Jovnna - Jon-Christer Mudenia, Deanus eret.

Duogáš otná rabas cealkámuščoahkkimii lea go Sámediggi ovttas Dálkkádat- ja birasdepartemeanttain leaba soahpan hábmet oktasaš plána sámi luossabivdokultuvrra seailluheapmái.

Mii oaidnit ahte luossabivdu lea njiedjan garrasit jogas ja mearas daid maŋemuš jagiin. Dát váikkuha vejolašvuođa doaimmahit árbevirolaš sámi luossabivdokultuvra, sihke gielalaččat ja árbedieđu ja -máhttu gaskkusteamis boahttevaš buolvvaide.

Danin háliidat guldalit din, ja din cealkámušaid mo seailluhit sámi luossabivdokultuvrra boahtteáigái.

Sámediggi, Biras- ja dálkkádatdepartemeanttain, oaidnit ahte lea ollu árbediehtu čadnon luossabivdovieruide Sámi guovlluin, mat eai leat seamma oahpisin buohkaide. Dát mielddisbuktá barggu ja ovddasvástádusa háhkat máhttu ja dieđu árbevieruid ja práksis birra, maid guovllu sápmelaš lea doaimmaihan áiggiid čađa.

Mii sávvat ahte dii buktibehtet eanet čuvgehusa dán birra otná čoahkkimis, ja buktibehtet din cealkámuša gulaskuddamii mii ain lea virggis áššis.

Mun boađán ovtta guovllus gos luossa lea dehálaš oassi servodagas, ja mun dieđán makkár nana čanastagat olbmuin, bearrašiin ja servodagas sáhttá leat lussii, gos luossa lea leamaš ja lea dehálaš oassin manin olbmot leat ásaiduvvon báikái. Diehttalas de váikkuhuvvo servodat, go ii beasa luosabivdit seamma láhkái go das maid lea bajásšaddan. Muhto mo mii dán dustet, dasa dárbbašat mii dis veahki.

Min vuolggasadji lea ahte luossabivdu lea dehálaš oassi sámi kultuvrra luondduvuđđosis, ja seammás lea dárbu hálddašit luossamáddodaga guoddevaš vuogi mielde.

Sámedikki ja Biras- ja dálkkádatdepartemeantta bivdit dis eanet čuvgehusa mo galgá seailluhit, nannet ja joatkit sámi luossabivdokultuvrra. Dát lea viiddis gažaldat maid jearan dis. Muhto mus lea jáhkku, go oainnán din dás dál, ahte dis leat buorit jurdagat mo olahit dán áigumuša.

Loahpas háliidan giitit buohkaid, geat leat veahkehan min lágidit dán rabas cealkámuščoahkkima.

Ollu giitu go beassat leat din guossi dáppe!