Silje Karine Muotka Siljá Somby/Sámediggi Buorit allaárvosaš guossit ja konferánsaoasseváldit.

Measta njeallje jagi leat gollan dan rájes go maŋemuš čoahkkaneimmet deikke Anárii digaštallat dáid guovddáš ja áigeguovdilis áššiid – namalassii min árbevierut. 

Árbevierut dahje maiddái immateriála kulturárbi man sáhtášii maid gohčodit njálmmálaš buolvvaid miel oahpahuvvon árbevierut, numo mu politihkalaš kollega Áilen Nigá Máhtte oktii dajai.

Lea dehálaš veaháš suoskkadit ja suokkardallat dáid doahpagiid, go sáhttá muhtimin leat váttis fáhtet dan duohta sisdoalu ja rivttes láhkai áddet mas dás lea sáhka.

Jus galgat fitnet buori gulahallama fáttá birra, de lea dehálaš ahte buohkat áddejit ja leat ovttaoaivilis mii doahpaga sisdoallu lea. Dát sáhttá gaskkohagaid leat hástalussan dákkáraš oktavuođain.

Nu mo dál go galgat lávket dán dehálaš fáddái ja geahčadit mo sáhtášii suoji lágidit min divrras árbevieruide.

Ii leat makkárge čiegus áššiid ahte sámiid kultuvra ja árbemáhttu ja -diehtu, leat eanet bivnnuhat go goassige ovdal. Dan mii vuohttit beaivválaččat buot dain buktagiin mat ilbmet, buot jearaldagain ja dan garra beroštumis maid moanat sámi ovddasteaddjit vásihit dáid áiggiid.

Earenoamážit maŋŋá Disney proseassa, mas maiddái sámi servodat vásihii dehálaš olahusa, go šiehtadalaimet ovtta máilmmi stuorámus fitnodagain ja oaččuimet sadjái historjjálaš soahpamuša man vuolláičálle golbma sámedikki ja vel Sámeráđđi, ja gos čielgasit daddjo ahte sámi kulturárbi lea sámi opmodat.

Dát lea dehálaš prinsihpa cealkámuš maid galggašeimmet duohtandahkat nu johtilit go vejolaš, duohtandahkat iežamet suodjalanvišuvnnaid ja nu dahkat vejolažžan dustet buot dán beroštumi min kultuvrii buori vuohkái.

Dát duohtandahkan sáhtášii maid buvttahit árvoráhkadeami, ja nu šaddat dehálaš oassin sámi servodathuksemis.

Sámedikki bealis leat maid čađahan guokte dievasčoahkkinášši, ja leat vel álggahan prošeavtta, namalassii IMKÁS ovdaprošeakta, mii lea čuovvoleapmi Sámi Parlamentáralaš Ráđi doaibmaplána áigumušas.

Maiddái min ođđaseamos politihkalaš dokumeanttas, mii lea dat politihkalaš vuođđu čuovvovaš njealji jahkái – Beaiveálgu – loktet mii árbedieđu ja immateriála kulturárbbi politihkalaš agendai.

Sámediggi leage áŋgirit čuvvon olles dán konferánssa proseassa, ja lea čielggas ahte mis leat ain ollu dehálaš barggut báhcán olahan dihtii duohta iešmearrideami dáidda gažaldagaide.

Dán olis háliidan deattuhit ahte lea dehálaš ahte sámi servodat ieš beassá ráfis ja iežas eavttuid mielde digaštallat mo suodjalit min iežamet kulturárbbi.

Dát leat leamaš min láidesteaddjit don doloža rájes, ja galget fas min buolvvaid láidestit ovddasguvlui.

Suoji ceggen lea resursagáibideaddji. Danne lea maid buorre ja dehálaš ahte fáddá loktejuvvo davviriikkalaš dásis, ja mii leat hui giitevaččat go maiddái eiseválddit čájehit doarjundáhtu ja beroštumi sámi kulturmáhtu hárrái. Mii dárbbašit doarjaga duohtandahkat iežamet iešmearrideami.

Loahpas háliidange giitit Suoma oahpahus- ja kulturministeriija ja buot ovttasbargoguimmiid go leat nu áŋgirit ja árjjalaččat doaimmahan dán konferánssa.

Lihkku konferánssa čađahemiin ja giitu mu oasis!