Ráhkis girjelohkit, čállit, lágideaddjit ja berošteaddjit.

Háliidan vuos giitit go mun beasan oasálastit Sámi girjjálašvuođabeivviide. Munnje lea buorre dovdu go beasan dinguin deaivvadit, dis oahppat, ja searvat ságastallamii.

Mun lean Muden-Ovllá-Pier-Erkke-Jovnna, Jon-Christer Mudenia, ja lean Sámedikki ráđđelahttu.

Háliidan álggahit muhtin jurdagiin mii mus bođii go smiehttagohten Sámi girjjálašvuođa birra.

Girjjálašvuođabeivviid han galget leat dego ávvudeapmin sámi girjjálašvuođas ja kultuvrras, mii lea máilmmiservodagas áidnalunddot.

Buot máilmmi girjjálašvuođa ektui, de lea Sámi girjjálašvuohta erenoamáš. Gii livčče čállit Beaiveálggu, jus vel ii sámi girječálli Anders Larsen?

Gii livčče Sameproblemet čállit, jus vel ii Sámi girječálli Katrine Nedrejord?

Gii livčče divttaid čállit, mat gártet lávllateakstan Mari Boinii, jus vel ii Sámi girječálli Karen Anne Buljo?

Namaid geaid dál lean namuhan, leat dego ovdamearkkat, ja čájehit smávva oasáža dan rikkis Sámi girjjálašvuođas.

Ja doppe leat máŋga earát, eambbosiid go maid dás astan namuhit. Ja lihkkos lea nu. Sámi girjelohkit lea seamma máŋggageardánis go girječállit, ii ge sáhte ovtta kategoriijai bidjat buot Sámi girječálliid.

Lihkká de lea dehálaš ahte mis leat máŋga girječálli, go sámi girječálli lea duohtavuođas dat áidna gii máhttá ja sáhttá čállit dakkár muitalusa mii fátmmasta duohta Sámi giela, kultuvrra ja sielu, ja mii govvida eallima Sámi perspektiivvas.

***

Áiggiid čađa min giella ja kultuvra han lea dulbmojuvvon. Mun dás čuoččuhan dan, ahte dan buolli beroštumis mii lea gávdnon Sámi girječállis áiggiid čađa, de ii livčče min giella ja kultuvra leat dan morránandilis mii otne lea.

Girječálli lea son gii lea seailluhan ja sihkkarastán ahte min giella, min muitalusat, min máidnasat, min kultuvra, ja min oktasaš siellu lea seailluhuvvon dáruiduhttináigodagas otnážii. Dan ovddas lean agálaččat giitevaš.

Háliidan loahpas giitit din geat searvabehtet girjjálašvuođabeivviide, ja Sámedikki girjerádjosa bargiid, go lágidehpet girjjálašvuođabeivviid.

Dii lehpet oassin dan gudnejahttimis, man otná ja boahtteáiggáš, sámi girječállit- ja girjelohkit ánssášit. 

Giitu mu oasis. Sávan lihkku doaluin ja ságastallamiin.