Berit Marie P. E. Eira Árvu/Sametinget

Buorit gilvaleaddjit, lágideaddit ja geahččit

Munnje lea stuora gudni Sámedikki bealis cealkit dearvvuođaid ja lihkkusávaldagaid didjiide geat dál galgabehtet čájehit iežadet suohpangieđa gilvvohalládettiin beassat 2024  norggameasttirin njoarosteamis. Mii geat boazobarggus njorostallat, diehtit man stuora árvu lea go dárveha rievttes bohcco ja dán bokte čájeha árjjalašvuođa ja searaid. 

Dál ii leat dušše dievás ja gárddis gos suohpan šnjiviha, muhto maiddái gilvvuin gávpogis nu go dáppe Tromssas. Munnje lea hui somá searvat dáidda doaluide, go boađán birrasis gos lea stuora beroštupmi njoarostangilvvuide. Lea gudni leat suohpangiehta!  

Njoarosteapmi lea oassi sámi árbevirolaš bargguin mii lea jorran suohtastallamin ja ođastuvvon gilvun stuora vuoittuiguin. Ja nu lea maiddái suohpan rievdan. Gilvalettiin ii anit šat bihkkaduvvon oarra maid min ádját ja áhkut atne. Dál galgá leat jahkeáigodaga miel báddi, rievttes deaddu ja ilmmi miel ráhkaduvvon. Mun sávan njoarosteddjiin leat suohpanat otná galbmagrádaid ektui. Ivdni ii soaitte gal leat nu dehálaš. Šaddá somá oaidnit makkár suohpan dán jágá norggameasttiris lea!

Mun áiggun maid rámidit lágideddjiid Midnight Sun Marathon, geat áŋgiruššet lágidit sámi vahkku dáppe. Dán jagi lea 20 jagi dan rájes go vuosttaš geardde lágiduvvui sámi vahkku Tromssas. Lágideaddjit  bidjet olu návccaid ráhkadit prográmma mii geasuha olbmuid. Olles vahkku leat leamaš konsearttat, filbmačájeheamit, duodjekurssat, fanasmátkkit ja olu eará. Ja odne ja ihttin lea dat stuora finála – norggameasttirgilvvut njoarosteamis, ja ihttin fas heargegilvvut. Lean nu giitevaš go árbevirolaš doaimmaide biddjo ná stuora árvu ahte loahpahit Tromssa sámi vahkku!

Sávan oktii vel hui olu lihkku gilvaleddjiide geat gealdagasas dál galget čájehit geas dat albma suohpangiehta lea!

Giitu!