Dát ovttasbargoorgána lea leamaš gulahallanorgána ámmátdásis dien golmma riikka ráđđehusaid gaskkas diehtojuohkima ja digaštallama várás. Ovttasbargolávdegotti sadjái bođii 2001 Davviriikkaid ámmátolbmoorgána sámi áššiid várás, mas maiddái sámedikkit leat ovddastuvvon.

2000 ásahuvvui bistevaš ovttasbargu sámediggepresideanttaid ja daid ministariid gaskkas, geain lea ovddasvástádus sámi áššiin Suomas, Ruoŧas ja Norggas. Ministarat ja sámediggepresideanttat deaivvadit jeavddalaččat juohkit dieđuid, ságaškuššat ja meannudit sámi áššiid main lea oktasaš beroštupmi. Ođđa davviriikkalaš ovttasbarggu ulbmil lea nannet ja ovddidit sámi álbmoga giela, kultuvrra, ealáhusaid ja servodateallima. Ovttasbarggus lea eahpeformálalaš, muhto lagaš čatnaseapmi Davviriikkaid Ministtarráđđái. Áššiid ráhkkaneami ja čuovvoleami fuolaha Davviriikkaid ámmátolbmoorgána sámi áššiid várás. Dan golmma riikkas lea vuoruid mielde ovddasvástádus gohččut čoahkkimiidda ja jođihit daid. 2005 sirdojuvvo Supmii čállingoddedoaimma ovddasvástádus Ruoŧas, masa dat sirdojuvvui Norggas 2004. Ođasmahttin-, hálddahus- ja girkodepartemeanta lea ovddasvástideaddji departemeanta Norggas.

Ministarat ja sámediggepresideanttat mearridedje skábmamánus 2001 ásahit áššedovdijoavkku ráhkadit davviriikkalaš sámekonvenšuvdnaevttohusa raportta "Behov og grunnlag for en nordisk samekonvensjon" vuođul. Joavkkus ledje mielde guokte lahtu juohke riikkas, okta ráđđehusas ja okta sámedikkis. Áššedovdijoavku bargagođii ođđajagimánus 2003, ja leverii iežas sámekonvenšuvdnaevttohusa jagis 2005.

Loga eanet davviriikkalaš sámekonvenšuvnna birra

Davviriikkalaš oktasaščoahkkimiid beavdegirjjit