Bálkkádoarjja sáme mánájgárdijda ja åssudagájda laseduvvá

Bálkkádoarjja sáme mánájgárdijda ja åssudagájda laseduvvá

Sámedikkeráde tjuovvol Biejveálggotjielggidusáv lasedimijn máksomierev sámegiela máhtudahkaj doarjjaårdnigin sáme mánájgárdijda ja åssudagájda ja ásadimdoarjjaj. – Nannip vuorodimev rekruttierimijn ja sámegielajn sáme mánájgárdijn, javllá sámedikkeráde Mikkel Eskil Mikkelsen (NSR).

Sámedikkeráde laset máksomierijt doarjjaårdnigin Doarjja sáme mánájgárdijda ja åssudagájda, ja vaddá 16 000 kråvnå lase gitta guokta sámegielak barggijda. Juohkka mánájgárdde ja åssudahka bæssá åhtsåt dårjav guokta barggijda juohkka åssudagán. Dat vaddá lase bálkkádårjav 32 sáme mánájgárdijda ja åssudagájda ålles sáme sebrudagán.

– Vaddep mánájgárdijda máhttelisvuodav bálkkádásev låpptitjit, sæmmi båttån la Sámedikken stuoráp kvalitiehttabarggo jådon mánájgárddeprosjevta SÁMOSa baktu. Dán láhkáj dahkap buorre vuodov vuorbástuvátjit mánájgárdij giellabargojn, javllá Mikkelsen.

Lasse doarjja sáme mánájgárddefálaldagáj ásadibmáj

Sæmmi båttå laseduvvá máksomierre sáme mánájgárddefálaldagáj ásadibmáj 300 000 kråvnås gitta 500 000 kråvnnåj doarjjaårdnigin Doarjja prosjevtajda ja åvddånahttembargguj.

Mikkelsen tsuojggi dárbbo l ienep sámegielak mánájgárddefálaldagájda.

– Lasedip dårjav sáme mánájgárddefálaldagáj ásadibmáj mánájgárddeæjgádijt vájkkudittjat vaj vijdedi ja dahki ienep fálaldagájt. Sávav dát luovvi visses ásadimijt, mij dahká sáme máná oadtju sáme mánájgárddesadje fálaldagáv.

Máhtudahka ja rekruttierim la ájnas

Sámedikkeráde l Biejveálggotjielggidusán dåjmajt vuorodam duostotjit máhtudakhiehtedilev sáme mánájgárdijn ja skåvlåjn. Duola degu tjuodtjo Biejveálggotjielggidusán jut galggap barggat bálkkádáse lassáni mánájgárddeåhpadiddjijda ja vuodoskåvllååhpadiddjijda. Mikkelsen javllá máksomierij lassánibme sámegielak barggijda l guovdásj doajmma duostotjit máhtudakhiehtedilev.

– Akta mijá stuoremus bargojs la barggat jut sáme máná ja nuora oadtju buorre sámegielak fálaldagáv mánájgárdijn, danen gå dåppe giellabarggo moatteláhkáj álggá. Danen hæhttup mánájgárdijt dahkat gæsánis barggosadjen.

Oasse stuorep ratjástibmáj

Aktisasjbarggoguojme Biejvveálggoaktisasjbargon li sierralágásjvuorodibmen tjalmostahttám sáme mánájgárdijt dán sámediggeájgegávdan. Mikkelsen javllá dánna li loahpádusá ienep dåjmajt álgadit.

– Doarjjaårdnigij máksomierijt lasedit la vuostasj lávkke, boahtte lávkke l bargov álgadit åttjudit nåvku sáme mánájgárde sajev. Dán baktu sávav ienep sáme máná oadtju mánájgárddefálaldagáv mij la vuododuvvam sáme giellaj ja kultuvrraj ietjaska riektáj milta.

Ságájdahttem jali gatjálvisá, guládalá  sámedikkerádijn Mikkel Eskil Mikkelsen (NSR). +47 917 42 161, mikkel.eskil.mikkelsen@samediggi.no