Sámedikki čihččet giellamovttiidahttinbálkkašumi oažžu olmmoš gii lea bidjan ollu návccaid nannet, ovddidit ja seailluhit sámegiela.
– Jusse Juhán Niillasa Gáre Márjá lea iežas bargguid bokte čilgen sámi árvvuid, árbevieruid ja movt dat leat čadnon gillii. Dán son lea dahkan vuollegašvuođain ja ráhkisvuođain sámegillii ja sámi kultuvrii, dadjá sámediggepresideanta Aili Keskitalo.
Bargan seailluhit árbevirolaš máhtu ja fágagiela
Sámegiella lea árgabeaigiella oallugiidda, muhto fágagiella mii adno árbevirolaš bargguid barggadettiin ii leat šat nu nanus go servvodat lea ollu rievdan ja ain rievdá. Bálkkašumi vuoiti lea oaidnán dárbbu seailluhit ja nannet árbevirolaš máhtu ja giela mii lea čadnon dasa. Áŋgirvuođa ja ceaggáivuođa bokte Gáre Márjá lea buvttadan máŋga oahppogirjji mat dál leat ávkkálaččat olles servodahkii ja erenomáš ávkkálaččat ovttaskas olbmuide.
Son lea maiddai fievrridan viidásit árbevirolaš máhtu govaid, dujiid ja servvodatságastallama bokte. Gáre Márjá lea maiddai ráhkadan erenoamáš kaleandara, mii álgá miessemánus ja nohká cuoŋománus ja son čuovvu nu boazojagi. Kaleanddar lea beaggán Sámis ja heaŋgá oallugiid ruovttuin.
– Son lea árbediehtti gii lea olles eallináiggi geavahan addit viidásit ja gaskkustit árbevirolaš máhtu mánáide, nuoraide ja earáide. Sihke iežas bearrašii, muhto maiddai sohkagoddái, sámi servvodahkii ja stuoraservvodahkii, ja dan bokte čájehan praktihkalaččat man ollu máhttu ja diehtu lea vurkejuvvon min gielas, čilge Keskitalo.
Bálkkašupmi lea 50.000 ruvnno ja dáiddadiploma, man dáiddár Kamilla Triumf lea hábmen.
Loga sámediggepresideantta Aili Keskitalo sártni geigejumi oktavuođas
Bálkkašumi vuoiti: – Ilus go bargu fuomášuvvo
Sámediggepresideanta geigii bálkkašumi Karen Marie Eira Buljoi Sámedikki dievasčoahkkimis gaskavahku geassemánu 16. beaivvi. Eira Buljo lea giitevaš ja hui ilus go guhkesáigge áŋgirruššan adnojuvvo árvvus.
– Munnje lea nu movttiidahtti ja illudahtti ahte illá leat mus sánit dan čilget. Mun lean rahčan olu ja dáinna bálkkašumiin dovddan ahte mu bargu fuomášuvvo ja dohkkehuvvo. Mađi eanet vuostehágu dovden, dađi eanet dat movttiidahtii mu bargat viidáset. Dáruiduhttin lea nu garrasit váikkuhan sámi servodaga, ja guhká lei dego vuostebiggii bargat. Dál dovddan ahte beasan miehtebiggii bargat, ja olbmot háliidit oahppat sihke giela ja dan mii birastahttá giela. Giella lea čadnon bargguide, ja min barggut ges čadnon eatnamiidda, dálkkiide ja čázádagaide, dadjá Eira Buljo.
Duogášdieđut:
Sámi giellaráđđi ásahii giellamovttiidahttinbálkkašumi jagi 2000, ja geigejuvvo ovttaskas olbmuide dahje ásahusaide ja organisašuvnnaide geat leat bidjan ollu návccaid nannet, ovddidit ja seailluhit sámegiela. Dan maŋŋel lea Sámedikki giellastivra ja sámediggeráđđi juolludan bálkkašumi.
Sámedikki giellamovttiidahttinbálkkašumi ovdalaš guhtta vuoiti leat Divttasvuona váhnenjoavku 2000:s, Skániid giellajoavku 2001:s, Harry Solhaug Gáivuonas 2002:s, Sagka Stångberg Deartnás 2009:s, Iŋgor Ántte Ánte Mihkkal/Ánte Mikkel Gaup 2013:s ja Jane Astrid Juuso Unjárggas 2017:s.
Jearahallamiid várás:
Sámediggepresideanta Aili Keskitalo (NSR), tel. +47 97 12 93 05
Bálkkašumi vuoiti Karen Marie Eira Buljo, tel. +47 461 89 976
Govat bálkkašumi geigejumis