Sámediggi lea ovddidan vuostecealkámuša ođđa 420kV el-fápmolinjái Davvesiiddas Sáttovárrái sámi kultuvrra ja ealáhusaid luondduvuođu vuhtiiváldima dihte ja sihkkarastin dihte sámi kulturmuittuid. Cealkámušain plánejuvvon bieggafápmohuksemii ja plánejuvvon 132 kV fápmolinjáide lea Sámediggi ovddidan čielga vuordámuša ahte váikkuhusat boazodollui, meahcásteapmái ja sámi kulturmuittuide fertejit vuđolaččat čielggaduvvot. Loga buot cealkámušaid.

Sámediggái lea erenoamáš deaŧalaš ahte NČE gáibida ahte sis geat čielggadit boazodoalu dahje sámi meahcásteami lea boazodoallofágalaš gelbbolašvuohta ja kultuvrralaš áddejupmi gažaldagain maid sii galget čielggadit. Sámediggi deattuha dárbbu ahte sámi álgoálbmotmáhttu váldojuvvo mielde čielggademiide seamma dásis go dutkanvuđot máhttu.

Sámediggi lea čuoččaldahttán ášši stáhta vuostá Muolkkuid elektrifiserenmearrádusa oktavuođas danne go Sámediggi oaivvilda ahte mearrádus ii leat gustovaš. Mearrádusa váikkuhusat eai leat čielggaduvvon, eai ge Sámedikkiin leat leamaš konsultašuvnnat mearrádusa birra. Sámediggi čujuha cealkámušain ahte buot proseassat bieggafápmo- ja fápmojođđasa huksema birra galggašedje bissehuvvot dan botta go rievttálaš čielggadeamit mearrádusa gustovašvuođa birra váilot. Riekteášši Energiijadepartemeantta vuostá šaddá Oslo diggegottis miessemánus 2025.

Viidáset proseassa

Boahtte ášši mii dáhpáhuvvá barggus dieđihuvvon sisabahkkenáššiiguin, lea ahte NČE mearrida čielggadanprográmma. Doaibmaálggaheaddjit čielggadit ja hábmejit ohcamušaid.  NČE jáhkká ahte konsešuvdnaohcamat sáddejuvvojit gulaskuddamii 2026:s.

420kV fápmolinnjá oktavuođas Davvisiiddas Sáttovárrái meannudišgoahtá NČE dál vuosttaldemiid ja mearkkašumiid mat leat boahtán. NČE ráhkada evttohusa Energiijadepartementii mii dahká loahpalaš mearrádusa áššis.

NČE lea bidjan ovdan tentatiiva áigeplána viidáset proseassas sisabahkkenáššiiguin mat čatnasit "Kraftløft Finnmarkii".

Ođasmahttojuvvon dieđuid gávnnat NVE neahttasiidduin: Tidsplan og frister - NVE

Doarjja sámi vuoigatvuođalaččaide 

Sámedikkis lea doarjjaortnet prošeavttaide ja doaibmabijuide maid ulbmil lea veahkehit sámi vuoigatvuođalaččaid áššiin mat gusket eana- ja resursavuoigatvuođaid fuolaheapmái, dás maiddái áššiin mat gusket árbevirolaš sámi ealáhusaid suodjaleapmái.  Ohcanáigemearit leat njukčamánu 2. b. ja čakčamánu 1. b. 

Loga eanet doarjjaortnega birra Sámi areála-ja resursavuoigatvuođat