Sámi dearvvašvuođadutkama etihkalaš lávdegoddi

Sámi kollektiiva miehtan galgá ordnejuvvon sámi dearvvašvuođadutkama oktavuođas. Sámediggeráđđi lea delegeren válddi Sámi dearvvašvuođadutkama etihkalaš lávdegoddái addit dakkár miehtama.

Sámi dearvvašvuođadutkan lea dutkansuorgi mii jođánit ovdána. Seammás eai vuhtiiváldde lágat eaige eará dutkanetihkalaš njuolggadusat sámiid kollektiiva iešmearridanvuoigatvuođa dákkár dutkama oktavuođas. Danne lea Sámediggi mearridan Etihkalaš njuolggadusaid sámi dearvvašvuođadutkama várás 2019:s (ášši 23/19) ja maŋŋá revideren njuolggadusaid 2025:s (ášši 32/25).

Loga sámi dearvvašvuođadutkama etihkalaš njuolggadusaid (PDF, 241 kB)

Njuolggadusat leat vuođđuduvvon raportii maid sámediggeráđi nammadan áššedovdi lávdegoddi lea ráhkadan 2016:s, ja mat čuvvot julggaštusa 2011 sámeparlamentarihkarkonferánssas. Loga raportta: Forslag til etiske retningslinjer for samisk helseforskning og forskning på samisk humant biologisk materiale

Loga gulaskuddancealkámušaid raportii

Njuolggadusaiguin háliida Sámediggi sihkkarastit ahte sámi dearvvašvuođadutkan vuođđuduvvá álgoálbmogiid iešmearridanvuoigatvuhtii, ja vuhtiiváldá ja árvvusatná sámi kultuvrra ja sámi servodaga girjáivuođa ja iešvuođa.

Sámi kollektiivvalaš miehtama viežžan

Ohcanbagadus (PDF, 256 kB)

Jus leat eahpesihkar dárbbaša go du prošeakta sámi kollektiivvalaš miehtama, de sáhtát sáddet sisa ovdanbuktinárvoštallanskovi (Fremleggingsvurdering). Dáid áššemeannudit lávdegotti čálli ja lávdegotti jođiheaddji dahje nubbinjođiheaddji dađistaga.

Fremleggingsvurdering - Sámi dearvvašvuođadutkamii

Jus leat gažaldagat ohcamuša dahje njuolgadusaid birra, de sáhttá jearrat lávdegotti čállis Bent Martin Eliassen Strandås: bent.m.strandas@samediggi.no, +47 78 47 40 50.

Lávdegotti lahtut

  • Jođiheaddji Siv Kvernmo; professor/váldodoavttir, ph.d., UiT/UNN.
    • Peršovnnalaš várrelahttu: Margrethe Bals Utsi; suohkanpsykologa/psykologaspesialista, ph.d., Guovdageainnu suohkan/SANKS.
  • Nubbenjođiheaddji Maret Aile Sara; juridihkalaš čielggadeaddji, Finnmárkokommišuvdna.
    • Peršovnnalaš várrelahttu: Risten Inga Henriksen; diggeriekteduopmár, Sis- ja Nuorta-Finnmárkku diggegoddi
  • Anne Lene Turi Dimpas; suohkanpsykologa/psykologaspesialista, ph.d., Guovdageainnu suohkan/SANKS.
    • Peršovnnalaš várrelahttu: Jan Erik Henriksen; doseanta, UiT.
  • Torunn Pettersen; dutki, ph.d., Sámi allaskuvla
    • Peršovnnalaš várrelahttu: Susanna Ragnhild Siri, dutki, ph.d., UiT.
  • Lena Kroik; prošeaktakoordináhtor, guovlludivššár, Med Dr, Region Västerbotten. Ruoŧa Sámediggi nammadan.
    • Peršovnnalaš várrelahttu: Jon Petter Stoor; postdoktor, ph.d., Ubmi universitehta. Ruoŧa Sámediggi nammadan.
  • Ingrid Jåma; SANKS geavaheaddjiráđi lahttu ja Sámedikki vuorrasiidráđi 1. várrelahttu.
    • Peršovnnalaš várrelahttu: Kristine Julie Eira. Sámedikki vuorrasiidráđi jođiheaddji.
  • Heidi Eriksen; doavttir. Suoma Sámediggi nammadan.
    • Peršovnnalaš várrelahttu:  Lydia Heikkila, seniorráđđeaddi. Suoma Sámediggi nammadan.

Sámediggeráđđi nammada lávdegotti lahtuid gitta ovtta dievasčoahkkináigodahkii. Lávdegoddi sáhttá dárbbu mielde viežžat eanet gelbbolašvuođa, omd. genehtalaš gelbbolašvuođa.  Kollektiiva miehtan gáibida unnimusat 2/3 eanetlogu. Mearrádusaid lea vejolaš dahkat go eai leat unnit go 4 lahtu/várrelahtu mielde. Jođiheaddjis lea duppaljietna ja lávdegotti eanetlohku vállje su.

Čoahkkinbeaivvit ja ohcanáigemearit

Čoahkkinbeaivvit ja ohcanáigemearit
Čoahkkinbeaivvit 2025 Ohcanáigemearit 2025
Ođđajagimánu 23. b. Ođđajagimánu 8. b.
Guovvamánu 11. b. Ođđajagimánu 28. b.
Njukčamánu 19. b. Njukčamánu 5. b.
Cuoŋománu 23. b. Cuoŋománu 9. b.
Miessemánu 21. b. Miessemánu 7. b.
Geassemánu 16. b. Geassemánu 4. b.
Borgemánu 20. b. Borgemánu 6. b.
Čakčamánu 17. b. Čakčamánu 3. b.
Golggotmánu 22. b. Golggotmánu 8. b.
Skábmamánu 19. b. Skábmamánu 5. b.
Juovlamánu 17. b. Juovlamánu 3.b.

Čoahkkimat álget dábálaččat diibmu 08.30 ja bistet diibmu 10.30 rádjái. 1-2 čoahkkima sáhttá čađahit fysalaččat.

Lávdegotti mandáhtta

Sápmelaččain lea kollektiivvalaš iešmearridanvuoigatvuohta siviila ja politihkalaš vuoigatvuođaid ON konvenšuvnna mielde, ja ekonomalaš, sosiála ja kultuvrralaš vuoigatvuođat (ESK) mielde, ja ON álbmotálbmotjulggaštusa mielde. Maiddái ILO-konvenšuvnna 169 mielde ja Sámedikki ja stáhta eiseválddiid konsultašuvdnabargovuogi mielde, mii lea mearriduvvon gonagaslaš resolušuvnnas 2005:s, lea sápmelaččain vuoigatvuohta searvat ovttaárvosaš bealálažžan dearvvašvuođadutkamušprošeavttaid buot dásiin. Lávdegoddi galgá:

  • Sámi álbmoga olis addit kollektiiva miehtama sámi dearvvašvuođaprošeavttaide Norggas.
  • Addit kollektiiva miehtama gustovaš sámi dearvvašvuođadutkama etihkalaš njuolggadusaid mielde.
  • Árvvoštallat dutkanprošeavttaid sierra čoahkkimis ja ovdal čoahkkimiid medisiinnalaš ja dearvvašvuođafágalaš dutkanetihka Regiovnnalaš lávdegottiin (REK).
  • Dárbbu mielde gulahallat ja leat olámuttus medisiinna ja dearvvašvuođafága Nationála dutkanetihkalaš lávdegotti várás (NEM), REK ja eará relevánta dutkanetihkalaš lávdegottiide.
  • Nu bures go vejolaš vástidit dutkanetihkalaš gažaldagaid dutkanjoavkkuin ja dutkiin, ja oassálastit relevánta forain.
  • Evalueret ja dárbbu mielde evttohit rievdadusaid sámi dearvvašvuođadutkama etihkalaš njuolggadusaide.

Komitéens bestemmelser om habilitet. (PDF, 144 kB) 

Maŋemusat rievdaduvvon 14.08.2025 13.33

Juogadanboalut