- Mijjieh akte åålmege staateraasti dåaresth, men biejjieladtje mijjieh dan sveekes dejnie abpesaemien perspektijvine barkebe dan tjyölkehke goh mijjieh daennie barkosne dorjeme. Gieltege orreme haestieminie nierhkedh mijjen ektie eekereaktam aktede abpesaemien vuajnoste, saemiedigkiepresideenth Tiina Sanila-Aikio (Soeme), Aili Keskitalo (Nöörje), Per-Olof Nutti (Sveerje) jïh saemieraerien presideente Åsa Larsson-Blind jiehtieh.
Ååkteme jïh jååhkesjimmie
Snjaltjen 2019 Saemiedigkieh jïh Saemieraerie saarnoejin akte noerhtesaemien versjovne edtji filmeste Frozen 2 dorjesovvedh, goh illedahke laavenjostoste gaskem Saepmie jïh sïelte Walt Disney Animation Studios. Saemiedigkien jïh Saemieraerien gaavhtan lea vihkeles orreme gorredidh saemien kultuvre mij skraejrine orreme filmesjugniedæjjide filmen duekesne Frozen 2, ååkteminie jïh jååhkesjimmine gïetesåvva. Dan åvteste akte sjïere saemien tjiehpijedåehkie tseegkesovvi juktie filmesjugniedæjjide viehkiehtidh saemien kultuvresne, histovrijisnie, reaktine jïh seabradahkejieliedisnie vaaksjoehtidh mearan lin filmine barkeminie. Saemien barkoedåehkien nomme «Verddet» sjïdti.
– Mijjieh garmerdibie mijjen «Verddet»-lïhtsegh mah faagedaajroem jïh sijjen sjïere dååjrehtimmieh buakteme daan barkoen sïjse, saemien presideenth jiehtieh.
Verddet-dåehkesne Karen Anne Buljo, Veli-Pekka Lehtola, Cecilia Persson, Piia Nuorga, Christina Hætta jïh Anne Lajla Utsi meatan.
Sjïere nuepieh
Latjkosne gaskem saemien åålmege jïh sïelte Walt Disney Animation Studios lea aaj jeatjah positijve lissiekonsekvensh saemien åålmegasse, goh faageles låtnome gaskemsh jïh maahtoeevtiedimmie. Gaajhke edtja aevhkine sjïdtedh saemien seabradahkese.
– Daennie prosessesne libie tjoereme identifiseeredh mij lea vyörtegs mijjen seabradahkese ållesth, gaskem jeatjah utnebe råajvarimmieh mah maahtoem lutnjieh jïh potensijelle laavenjostoenuepieh saemien kultuvrebarkijidie goh vihkeles dåarjoe abpe Saapman. Mijjieh aavoedibie jienebh detaljh dan bïjre juekedh mænngan nuepieh bæjhkoehtamme sjidtieh, presideenth jiehtieh.
Jååhkesjamme latjkoe:
Agreement between Walt Disney Animation Studios and the Sámi people (PDF, 8 MB)
Biografije Verddet (PDF, 452 kB)