Saemiedigkien bïjre

Saemiedigkie (noerhtesaemien: Sámediggi, julevsaemien: Sámedigge, skoltesaemien: Sää´mtee´ǧǧ, upmejesaemien: Sámiediggie, pijtesaemien: Sámedigge) lea Nöörjen saemiej almetjeveeljeme årgaane.    

39 tjirkijh veeljesuvvieh 7 veeljemegievlijste fïerhten njealjeden jaepien. Saemiedigkie edtja saemiej politihkeles sijjiem nænnoestehtedh jïh saemiej ïedtjh skreejredh Nöörjesne, viehkiehtidh guktie saemieh seammavyörtegs jïh seammaligke gïetedimmiem åadtjoeh, jïh sjïehteladtedh guktie saemieh maehtieh sijjen gïelem, sijjen kultuvrem jïh sijjen siebriedahkejieledem gorredidh jïh evtiedidh.

Voestes saemiedigkieveeljeme hööltesovvi tjaktjen 1989 jïh gånka Olav V. dam voestes byögkeles Saemiedigkiem rïhpesti golken 9.b. Karasjohkesne.