Saemiedigkien ulmine åtna eatneme- jïh vierhtievåarome saemien dajvine reeresuvvieh dejnie aajkojne mijjen båetiji boelvi jieledevåaromem gorredidh jïh dej lea nuepie saemien kultuvrem evtiedidh. Reereme edtja viehkine årrodh saemien kultuvrem, jielemegïehtelimmiem jïh seabradahkejieledem nænnoestidh. Vierhtiedajvh jïh eatnemegellievoete leah vihkeles bielieh dehtie materijelle kultuvrevåaroemistie saemien kultuvrese. Dïhte våaromem beaja saemien jieliemidie, årroemasse, kultuvrese jïh seabradahkeevtiedæmman. Hijven reereme dajvijste, eatnamistie jïh kultuvreaerpeste lea dan åvteste vihkele edtja saemien kultuvrem vaarjelidh jïh evtiedidh.