Noerhtelaanti saemiekonvensjovne

Nöörje, Sveerje jïh Soeme leah rååresjimmide noerhtelaanti saemiekonvensjovnen bïjre galhkeme. Rååresjimmien åvtehkh dam rååresjamme konvensjovneteekstem nænnoestin tsïengelen 13.b. 2017. Daelie laanti reerenassh jïh saemiedigkieh raeriestimmiem gïetedeminie.

Lohkh dam rååresjamme raeriestimmiem Noerhtelaanti Saemiekonvensjovnese (PDF, 284 kB)

Bijjemes ulmie konvensjovnine lea saemieh edtjieh maehtedh sijjen kultuvrem vaarjelidh, nuhtjedh jïh evtiedidh dan vaenie heaptojne laanteraastijste goh gåarede. Konvensjovneraeriestimmesne tjïjhtje kapihtelh teemaj bïjre 1) Saemien åålmegen sïejhme reaktah, 2) Jïjtjenænnoestimmie, 3) Gïele jïh kultuvre, 4) Eatneme jïh tjaetsie 5) Jielemh, 6) Tjirrehtimmie konvensjovneste, 7) Nænnoestimmieh vuelietjaelemen, ratifikasjovnen, hiejhtemen jïh vielie bïjre

Raeriestimmie noerhtelaanti saemiekonvensjovnese lea sïejhme nöörjen reaktan jïh Nöörjen åålmehrïekteles åeliedimmiej mietie, jïh seamma tïjjen tjyölkehkåbpoe jïh vielie sjïehtedamme noerhtelaanti-saemien tseahkan.

Konvensjovneteekstesne tjåådtje saemiedigkieh edtjieh konvensjovnem åadtjodh vuelietjaelemen åvtelen. Konvensjovnen åvtebaakosne aaj tjåådtje saemiedigkieh tjuerieh sijjen jååhkesjimmiem vedtedh konvensjovnese.

Konvensjovneraeriestimmie aaj sjïehteladta akte barkoedåehkie mij lea vïedteldihkie orgaanese Nordiska ämbetsmannsorganet för samiska frågor edtja tjirrehtimmine konvensjovneste guhkiebasse barkedh. Barkoedåehkie edtja lïhtsegh utnedh mejtie fïereguhte staate jïh saemiedigkieh nammoehtieh jïh mah tjirkijinie sjidtieh fïereguhte staateste jïh saemiedigkeste. Dïhte guhkiebasse barkoe edtja dialogen tjirrh darjodh dejnie ulmine sïemes sjïdtedh vuekiej bïjre mah konvensjovnem eevtjieh.

Nöörjen rååresjimmiedelegasjovnesne lij göökte tjirkijh Tjïelte- jïh orrestimmiedepartemeenteste, akte tjirkije Ålkoerïjhkedepartemeenteste jïh göökte tjirkijh Saemiedigkeste.

Duekie

Akte noerhtelaanti tjiehpijedåehkie sov raeriestimmiem noerhtelaanti saemiekonvensjovnese böökti tjaktjen 2005.

Tjiehpijedåehkien raeriestimmie lij govlehtimmesne dejnie golme noerhtelaantine voestes bielien jaepeste 2006. Ministerh mah leah tjåadtjoehtæjjah saemien aamhtesi åvteste Soemesne, Nöörjesne jïh Sveerjesne, jïh saemiedigkiepresideenth dejnie golme laantine, sjæjsjalin barkoem noerhtelaanti saemiekonvensjovnine jåerhkedh jaepien 2006, aalkoelisnie jåerhkedh nasjonaale barkoen tjïrrh govlehtimmiejgujmie jïh konsekvenseanalyjsigujmie.

Barkoedåehkie tjirkijigujmie don baelien Barkoe- jïh iktedimmiedepartemeenteste, Justijsedepartemeenteste, Ålkoerïjhkedepartemeenteste jïh Saemiedigkeste konvensjovneraeriestimmine guhkiebasse barkin Nöörjesne. Tjiehpijedåehkien reektehtsen jïh govlehtimmielahtesi gaavhtan barkoedåehkie konvensjovneraeriestimmiem systematihkeles gïehtjedi, jïh raeriestimmien njoelkedassh nasjonaale reaktan jïh åålmehreaktan vööste vuarjasji. Barkoedåehkie sov reektehtsem böökti golken 3.b. 2007.

Ministere- jïh saemiedigkiepresideentetjåanghkosne tjaktjen 2008 seamadin barkojne nierhkedh juktie vuejnedh guktie maahta eventuelle konvensjovnerååresjimmieh rïektesisnie tjirrehtidh. Noerhtelaanti embeeteorgaane saemien gyhtjelasside (NÄS) dan mænngan raeriestimmine barki akten maallen bïjre eventuelle rååresjimmide

Nöörje, Sveerje jïh Soeme leah konvensjovnen bïjre rååresjamme 2011 mænngan, dejnie ulmide rååresjimmieh edtjin gaervies årrodh 2016.