Baalhkavitnijh 2000-2021:
2000 Eejhtegedåehkie Ájluokteste
Njieljie eejhtegepaarrh, Lill-Tove jïh Oddmund Paulsen, Anne Kalstad Mikkelsen jïh Filip Mikkelsen, Solvår Knutsen Turi jïh Arne Johan Turi, jïh Adele Nystø Ráhka jïh Per Arne Ráhka Saemiedigkien voestes gïeleskreejremebaalhkam åadtjoejin. Dah saemien maanagïertem eelkin Divtasvuodnesne 1989 dan itjmies gïeleevtiedimmien gaavhtan. Eejhtegedåehkie buektiehti gïeleevtiedimmiem reaktoe otnjegasse vihth åadtjodh, jïh numhtie buektiehti julevsaemien gïelem vaarjelidh jïh eevtjedh.
2001 Gïeledåehkie Skániteste
Dah lin vyörtegs gïelebaalhkam åadtjodh sijjen barkoen åvteste joekehts boelvh, dovne maanah, geerve almetjh jïh båarasåbpoe almetjh, madtjeldehtedh meatan åadtjodh gïeledarjoeminie. Dåehkie ovmessie gïelebarkoeh tjïrrehti terminologijen sisnjelen jïh saemien sijjienommh sïjse tjöönghki jïh vaarjeli.
2002 Harry Solhaug, Gáivuotna
Harry lea saemien gïeline barkeme Gáivuotna-dajvesne gellie jaepieh. Dïhte saemien sijjienommh registreereme jïh buerkiestamme, mearoesaemien terminologijine barkeme jïh maanagïertigujmie, skuvligujmie jïh gïelejarngine Gáivuotnesne laavenjosteme. Harry lij akte dejstie nööremes almetjijstie mah noerhtesaemien Manndalen smaaregïeline soptsesti. Dïhte pryövi gïelem vaarjelidh jïh eevtjedh Manndalen-dajvesne gellie luhkiejaepieh, gusnie gïele lea viesjies orreme guhkiem.
2009 Sagka Stångberg, Dearna
Sagke lea jïjnjem barkeme åarjelsaemien gïelem eevtjedh, joekoen maanaj jïh noeri njaalmeldh gïelem eevtjedh. Dïhte vuekieh vueptiestamme mah leah hijven maanaj jïh noeri gïelelïerehtimmesne, jïh dej vuekiej mietie ööhpehtamme gosse lohkehtæjjine barki. Jeenjesh leah åarjelsaemien lïereme viehkine Sagkan lïerehtimmievuekijste.
2013 Ingor Ántte Ánte Mihkkal/Ánte Mihkkal Gaup, Guovdageaidnu
Ánte Mihkkal lea gellielaakan barkeme saemien gïelem eevtjedh. Dïhte tjaelije, joejkije jïh lohkehtæjja. Dïhte saemien aerpievuekien joejkem våajnoes dorjeme, jïh saemiengïelem voerkeslaakan eevtjeme gosse saemien heamturh saemiej bïjre soptsestamme. Soptsesigujmie Juffán bïjre jïh jeatjah soptsesigujmie dïhte saemien njaalmeldh soptsestimmievuekieh, saemien aerpievuekieh, gïelem jïh jieledevuekieh buakteme.
2017 Jane Astrid Juuso, Unjárga
Jane Astrid lea barkeme ihke saemien gïele edtja hijven tsiehkieh utnedh Unjárgesne. Goh åvtehke Isak Saba-jarngesne dïhte gïelesijjieh tseegkeme gusnie saemien lea åejviegïele. Desnie faalenassh dovne maanide, geerve jïh båarasåbpoe almetjidie. Dïhte eadtjohkelaakan barkeme saemien gïelem jieliehtidh jïh dan sjïekenisnie kuvsjem «Válddán giellan ruovttoluotta /Manne gïelem bååstede vaaltam» evtiedamme.
2021 Jusse Juhán Niillasa Gáre Márjá/Karen Marie Eira Buljo, Guovdageaidnu
Karen Marie lea vuajneme daerpies saemien aerpievuekien daajroem jïh gïelem mij dïsse govlesåvva, vaarjelidh jïh nænnoestidh. Dïhte barkoem dorjeme vaajnojne, stenkiesvoetine, vyörtegsvoetine jïh gieriesvoetine saemien gïelese jïh kultuvrese.
Karen Marie lea sjïere biejjielåhkoem dorjeme mij aalka suehpeden jïh orreje voerhtjen, jïh dan gaavhtan båatsoejaepiem dåerede. Dïhte aaj jienebh learoegærjah bæjhkoehtamme, dej gaskem gærja låavthgåetieåtnoen bïjre jïh akte novhtehkegåaromen bïjre. Dïhte aaj Saemien jïlleskuvlesne ööhpehtamme saemien aerpievuekien daajrosne jïh faagegïelesne mij dïsse govlesåvva.