Saemiedigkien reereme lea gïelebyjresigujmie soptsestalleme åarjel- jïh julevsaemien dajvesne 2019, jïh dan prosessen tjïrrh Saemiedigkie vuajna daerpies jienebh gaavnedimmiesijjieh sjugniedidh pedagogide jïh gïelebarkijidie raaktan daejnie dajvine.
Saemiedigkie vuajna daerpies sjïere maahtoelutnjemestrategijigujmie lohkehtæjjide saemien skuvline jïh saemienlohkehtæjjide, gaskem jeatjah tjaeleme- jïh lohkemelïerehtimmien bïjre saemiengïelesne, guektiengïelevoetepedagogihken bïjre, åtnoe nænnoes lïerehtimmiemaalli bïjre jïh vuekiej bïjre mah læhkoes gïelelïerehtimmiem vedtieh. Daerpies maahtoelutnjeminie saemien duedtesne, jienebekulturelle goerkesisnie jïh aalkoeåålmegepedagogihkesne. Aaj daerpies lissiehtamme maahtojne guktie saemien gïelh, saemien kultuvre jïh aerpievuekien daajroe maehtieh skuvlese sertiestovvedh, daan nuelesne integreradimmie saemien gïelijste jïh saemien aerpievuekien daajroste eatnemefaagesne, siebriedahkefaagesne, matematihkesne jïh jeatjah faagine, jïh guktie gïeleguedtijh lïerehtimmesne nuhtjie.
Saemiedigkie edtja gïele- jïh lïerehtimmiekonferansh öörnedidh åarjel- jïh julevsaemien dajvesne, jïh viehkiehtidh viermieh tseegkedh gïelebarkijidie jïh pedagogide åarjel- jïh julevsaemien dajvesne. Daate sæjhta dovne maahtoem lutnjedh jïh faageles viermieh tseegkedh.
Lahtestimmiej mietie konferansen ulmiedåehkeste akte ektie konferanse sæjhta öörnesovvedh åarjel- jïh julevsaemien pedagogide jïh gïelebarkijidie. Voestes konferansem soejkesjeminie daelie, jïh edtja öörnesovvedh tjaktjen 2020. Konferansen teema sæjhta evtiedimmieprogrammh årrodh åarjelsaemien jïh julevsaemien gïelese, saemien aarvoeh jïh filosofije lïerehtimmesne, digitaliseradimmie jïh learoevierhtieh jïh nænnoes gïelemaallh.