Aajkoe gïeledajvine lea akte öörnege mij lea vielie sjïehtedamme tjïelti ovmessie gïeletsiehkide. Akte orre gïeledajve sæjhta vielie joekehtadteme årrodh jïh gïelemoenehtse lea raeriestamme dam ovmessie tjïeltekategoriji sïjse juekedh.
Saemiedigkien stoerretjåanghkoe gïelemoenehtsen raeriestimmiem orre gïeledajven bïjre gïetedi aamhtesisnie 053/18. Saemiedigkien stoerretjåanghkoe raereste tjïelth gïeledajvesne vïjhte kategoriji sïjse juekedh; saemien gïelevierhtietjïelth, saemien gïeleevtiedimmietjïelth, saemien gïelejieliehtimmietjïelth, saemien staaretjïelth jïh potensijelle saemien gïeletjïelth. Akte dejstie vierhkievierhtijste juktie bööremeslaakan maehtedh sjïehteladtedh guktie gïeledajveöörnege dam rïektes tsiehkiem fïereguhtene tjïeltesne vuesehte, sæjhta ovmessie tjïeltekategoriji tjïrrh årrodh. Orre saemien gïeledajve sæjhta konsekvensh åadtjodh daan beajjetje dåarjoeöörnegese tjïeltide saemien gïelen reeremedajvesne, jïh sæjhta daerpies årrodh lïhke dijalogem utnedh tjïeltigujmie jarkelimmiej bïjre dåarjoeöörnegistie.
Daelie dåarjoemodelline tjïeltide jïh fylhkentjïeltide saemien gïeledajvesne barkeminie, Saemiedigkien stoerretjåanghkoen nænnoestimmien mietie 053718 Saemien gïeledajve. Orre dåarjoemodeelle sæjhta teemine årrodh dejnie fïerhten jaepien tjïelteseminaarine. Sæjhta vihkeles årrodh bïevnesigujmie jïh tjïeltigujmie jïh fylhkentjïeltigujmie soptsestalledh gosse orre dåarjoemodelline barkeminie, jïh tjïelteseminaarh akte iemie areena dagkerh digkiedimmide.