Dah guaktah göökte smaave nïejth meatan utnigan, jïh gåalmede nïejte reakasovvi mearan lin desnie. Dïhte nommem Margrete Sofie Parisienne åadtjoeji. Dennie sjïehteladteme årromesijjesne dah bovtsh jïh låavthgåetieh, bïenjh, gierehtsh jïh jeatjah daeverh vuesiehtin mah edtjin dej jieledevuekiem vuesiehtidh. Vuesiehtimmie joekoen vietseles sjïdti.
Åarjelsaemide mah lin meatan daate lij stoerre feeleme, orre dååjresh – jïh akte vuekie såemies lissie beetnegh dïenesjidh. Dah læjhkan tïjjem Parisesne buerkiestin goh «stoerre noerhkeme» - idtjin åadtjoeh sijjen håaltoen ålkolen båetedh, jïh håaltoen bïjre giedtie mij lij göökte meeterh jolle.
Margrethe orre vuesiehtimmesne mïnni njieljie jaepiej mænngan, Chicagose. Geellebe gåetesne baetsieji båarasommes nïejtine, men Margrethe doh golme unnemes maanah meatan veelti, dïhte unnemes lij ajve govhten asken båeries. Faarosne jienebh Margrethen maadtoeladtjijste. Dah låavthgåetieh, gierehtsh, 14 bovtsh jïh 70 skaavtegh burhvine meatan utnin. Ajve akte bovtse bïerkeni mearan lin desnie govhte askh.
Borlon gåajkoe Lærdalesne
Bååstede Nöörjesne Margrethe göökte vielie maanah åadtjoeji. Gosse nööremes maana lij akten jaepien båeries, Margrethen geelle Amerikan gåajkoe vöölki. Idtji gåessie bååstede båetieh. Dellie Margrethe oktegh sjïdti tjïjhtje maanajgujmie.
Njieljie dejstie gåbloegossehtahkeste jaemiejin muvhtine jaepine. Dïhte båarasommes baernie aehtjeben minngesne Amerikan gåajkoe vöölki. Margrethe Valdresen gåajkoe vöölki, gusnie baernie Paulus ryöjnesjæjjabarkoem åadtjoeji.
Dïhte aajnehke nïejte Kristina geellebinie ektine Borlosne Lærdalesne orrijin. Dah bovtsigujmie desnie eelkin.
Saemiej rïjhketjåanghkoe 1917
Voestes saemiej rïjhketjåanghkoe lij Tråantesne 1917. Daate lij gaavnedimmie juktie saemiej tsiehkiem bueriedidh jïh tjoevkesem bïejedh tsiehkide båatsosne. Margrethe lij meatan tjåanghkosne, daktarinie jïh vïjvine ektine.
Vïjhte jaepiej dan mænngan Margrethe lij guessine dej luvnie Borlosne, jïh sealadi gosse edtji gåatan Skierdese, 58 jaepien båeries. Dïhte Borgundesne juvlelgi.