Jonas Nilsen

Voestes bielien jieliedistie dïhte bovtsigujmie gïehtele Sisnjelds Nååmesjevuemesne, åvtelen goh noere geerve almetje Fovsen gåajkoe jåhta. Dïhte Anna Brita Thomasdotterinie pruvrie, jïh dah jieliemassem bovtsijste utnieh Fovsesne. Jonas lea naa stoerre krievviem aehtjiebistie eerpeme, jïh dah ovmessie årromesijjiej gaskesne juhtieh, jaepieboelhki mietie.

Paarretjeguaktah tjïjhtje maanah åadtjoejægan luhkine jaepine – men dïhte minngemes baersieldimmie båajhtoehlaakan jåhta, jïh Anna Brita jaama. Jonas lea jåvkeles orreme guhkiem, jïh gosse aarpijinie sjædta, dellie nåake dejnie gåarede. Njieljie dejstie maanijste jaemieh gosse leah smaave, jïh doh jeatjah maanah tjoeri jeatjah almetjidie bïejedh. Båatsojne nåakelaakan gåarede jïh dïhte abpe krievviem dassa. 

Ovrehte jaepien 1900 dïhte aalka Valdresen gåajkoe vaedtsedh. Dïhte ryöjnesjæjjine aalka Jotunheim Båatsoesiebresne, jïh lea ryöjnesjæjja daennie dajvesne gellie jaepieh, jïh daamtaj årroeminie Nystuesne. 

Isvelihks daelviefeeleme

Akten biejjien elmie sjædta mænngan Berdalen gåajkoe feereme. Gelliej biejjiej mænngan Jonasen bïenje bååstede bööti Nystuen gåajkoe – oktegh. 

Jonas lea væjroste vaaltasovveme, men buektiehtamme væjroen sistie båetedh. Gosse buektiehti almetji gåajkoe båetedh Øvre Årdalesne, vaenieh vaarjoeh utnin jïh lij mahte båadtsoes-juelkien, treavkaj jïh voessen namhtah. Voenen almetjh Jonasem gorredin, dïhte orre vaarjoeh åadtjoeji jïh Lærdalen jïh Nystuen gåajkoe feeri. Dan mænngan Jonas maaje don isveligke tuvren bïjre soptsesti. 

Gosse Jonas idtji bovtsh ryöjnesjh, dellie ovmessie vaerine vaanterdi, åvtelen vihth Nystuesne jijhti gïjrege, riejries orre ryöjnesjæjjabarkoeh vaeltedh.

Jieleme vaanterdimmesne

Sov minngemes jaepieh Jonas lij Prestseterisnie Valdresisnie, men ij leah seekere gusnie sealadi. Naakenh vienhtieh dïhte sealadi Verranisnie, Malm tjïeltesne, men ij guhte kroeptesijjiem gaavneme. 

Abpe jieleden Jonas bijjene vaerine mïnni, jïh govlesovvi dovne daase jïh dosse. Juerie dan minngemes lïegkedimmiesijjien bijre maahta dagke måjhtajehtedh dan jieleden bïjre vihties håaltoen namhtah.