Lucie Mortensdatter Kant jïh ovnohke. Lucie lij båatsoesaemie Rosseste. Dïhte Valdresdajvide bööti goh lij noere, jïh stoerre bielieh sov jieliedistie desnie jielieji.

Voestes bielien raejeste 1900-låhkoen såemies båarasåbpoe guvvieh saemijste jïh. bovtsijste gååvnesieh. Guvvide daamtaj guvviedamme dej stoerre turistehotelli lïhke dajvesne. 

Saemieh lin attraksjovne turistejieliemisnie Nöörjesne. Daate negatijve vuekie saemide jïh jeatjah aalkoeåålmegidie gïehtjelidh, eelki joe 1800-låhkoen.

Vuesiehtimmieh jielije almetjijstie

1800-låhkoen sïejhme sjïdti aalkoeåålmegh jïh ammes åålmehtjïerth ovmessie sijjine Europesne jïh Amerikesne vuesiehtidh. Dah sijjen aarkebiejjien jieliedinie gïehtelin sjïehteladteme byjreskinie. Jielije almetjh vuesiehtimmieobjektine dorjesovvin. 

Aaj saemieh Nöörjeste lin meatan dagkerh vuesiehtimmine. 1889 akte dåehkie saemiejgujmie Rossen-dajveste lij meatan vuesiehtimmesne Veartenevuesiehtimmien åvtelen Parisesne. Akte stoerre fåantoe meatan årrodh lij sån doh gïerve tsiehkieh båatsoesaemide åarjene. Jeenjesh sijjen gåatomelaanth dassin, jïh jienebh tjïelth båatsoem nihtin.