Voeneskuvle Duorgasne
Voeneskuvle Duorgasne lij sïejhme skuvlegåetie sov baelien. Aarebi skuvle Tjeldebotnisnie (Ballangen) jïh Bogenisnie. Dïhte åtnose vaaltasovvi Duorgasne tjaktjen 1914.
Skuvleprotokollesne voestes jaepien tjåadtjoeji mennie åesesne lij skuvlem sertedh, tseegkedh jïh bueriedidh; "Det er medgået til i fullt ferdig stand, flytning, oppføring og utbedring av Lenvikmark skole, kroner 1964,74".
Daejnie skuvlegåetine voene orre stoerreståapoem åådtjeme maam meehtin gellide darjoemidie uhtjedh. Dah laavlomekovre eelkin 1934 jïh daanhtsojne jïh gaarsjelimmiesiebrine 1935. Gaarsjelimmiesiebrie plaeriem bæjhkoehti man nomme «Idretten», mearan kovre plaeriem «Basunen» bæjhkoehti.
Ööhpehtimmie nöörjengïelesne
Lij luhpehts skuvlesne saemiestidh. Doh jeenjemes lohkehtæjjah skuvleåejvieladtjide goltelin mah stillin abpe ööhpehtimmie edtji daaroengielesne årrodh. Learohkh lin åajvahkommes saemiengïeleldh jïh vaenie guarkajin destie mij ööhpehtimmesne jeahtasovvi.
Joakim Sletthaug lij lohkehtæjja 1930-jaepiej galhkuvisnie jïh goske skuvline galhkaji 1949. Idtji dïhte seammalaakan darjoeh goh lohkehtæjjah sov åvtelen lin dorjeme, dïhte gujht dovne nöörjen jïh saemien ööhpehtimmesne nuhtji. Dellie gaajhkh learohkh nåhtoem ööhpehtimmeste åadtjoejin
Dåara
Lij skuvle gåetien sisnie voerhtjen 26.b. 1942 raajan. Dan mænngan skuvle åejviekvarteerine åtnasovvi dejtie tyske dåaroefoevide Duorgan bïjre.
Duorga voenetjïerte
Aareh 1980-låhkoen årrojh Snubbesne tjiertem tseegkin mij åejvieulmine utni voenegåetiem tseegkedh jïh juhtiehtidh. 1986 sjæjsjalin voenegåetiem bigkedh skuvlegåetine ektine. Voenegåetien byögkeles rïhpestimmie lij 1989. Daan biejjien gåetiem vaarjelamme goh saemien kultuvremojhtese.
Sjurhpede!
Båeriesskuvle mij lij skuvlen nomme almetji gaskem, lij sijjie mestie almetjh bïllin mænngan jemhkelde sjïdteme. Jeenjesh leah baltastæjjah vuajneme skuvlegåetien sisnie jïh bïjre.
Jïh dle dïhte skuvle. Naakenh tjoevkesem vööjnin jemhkelds iehkedi, jalhts ij lij almetjh gåetien sisnie, tjoevkese mij idtji bååstede gïjkh – amma baltastæjjatjoevkese. Aaj heannadi mïetsi jïh smealladi båeriesskuvlen laptesne. Dellie såemies damti ov goh galmetjaetsie våålese rudtjem galki. Jis lij eevre aavrehke meehti gaagkoeh vuejnedh dovne skuvlen sisnie jïh ålkolen.
Akte kaarre mij gåetide veedtsi skuvlen baaktoe, ålmam vööjni mij stuerebe stuerebe sjïdti. Minngemosth dan jolle guktie elmiem jaksi. Ålma mij dam dååjri lij læstadijaanere John Esaiassen (1901-1969) gaertienistie Reinslett.
Akte hijven vierhtie baltastæjjaj vööste lij bæhtoem tsïhkije sjïjligujmie meatan utnedh. Skuvlesne amma jïjnjem sjurhpiedi, jïh gosse voene orre lohkehtæjjam åadtjoeji mij skuvlen lohkehtæjjatjïehtjelisnie årroeji, gellie båeries almetjh jeehti dïhte idtji maehtieh eevre «reaktoe» årrodh dan åvteste dan jïjnjem sjurhpiedi skuvlesne.
Lohkehtæjja soptsesti gosse skuvlen laptesne jïjjedi dellie lievsie jïjtsistie jamhkaji ts. 23 iehkeden. Akte iehkede varke nåhkeli gosse Reidar Elvebakk (1916-1981) ålmam tjeehpes vaarjoejgujmie råaki ohtjegåetien lïhke. Ålman akte hierkiegaamege gårroehjuelkesne – amma jïjtjehke bahha!
Anders jïh Lilly Reinslett maanajgujmie årroejigan skuvlesne 1949 – 1950. Dah daamtaj govlin almetjh mah traahpen bæjjese böötin, men gosse goerehtin ij guhte lij desnie. Dah daamtaj maanah govlin mah laptesne jïh skuvleståaposne vaarrin, men idtjin mejtegh vuejnieh. Juktie slïedtem Edmund vaarjelidh dah staelienejpiem maanavåågnesne utnin, dan åvteste baltastæjjah staeleste bïllin.
Annje jeenjesh Snubbesne mah kråvvadieh oktegh årrodh Voenegåetesne mænngan jemhkelde sjïdteme.
